ASMI i gezzi Sliman aεrur-is i leεbada n ṣṣeḥ, Yahwa icar-ed belli lǧens n Isṛayil ad ibḍu ɣef sin. D ayen i geḍran. Raḥabεam, mmi-s n Sliman, yuɣal d agellid deg wemkan n baba-s. Raḥabεam iqqur wul-is. D annect-a i gewwin εecṛa leεṛac n wegdud ad nafqen (εaṣin) agellid-agi. Leεṛac-agi uɣalen ţ-ţagelda n Isṛayil n umalu. Sin leεṛac nniḍen, nutni, qqimen d unṣiḥen ɣer ugellid-a Raḥabεam i gḥekmen ɣef ukersi n lḥekma n Dawed yellan di Yarucalim. Sin leεṛac-agi uɣalen ţ-ţagelda n Yahuda i d-iṣebḥen deg usammer.

Liḥala n snat tgeldiwin-a tezga tcebbel di lweqt meṛṛa ideg i beddent. Ssebba tameqrant d igelliden-nsent imεuṣa ur nelli ara d unṣiḥen. Tagelda n Isṛayil tenṭer akteṛ n tgelda n Yahuda axaṭer, si tazwara, igelliden i ţ-iḥekmen ţţawin agdud ad itbeε leεbada n lekdeb. Γas akken nnbi Ilyahu d nnbi Ilicaε, i d-issekren ula d lmeyytin, xedmen leεǧayeb imeqranen, tagelda n Isṛayil ur teksan ara, teţkemmil tikli-ines deg yir abrid. Γer taggara, Yahwa iεemmed i wat Acur ad hudden tagelda n umalu.

Tagelda n Yahuda tbedd akteṛ n lqern. Lameεna ula d neţţat iḥuza-ţ lεiqab n Ṛebbi. Siwa kra n igelliden n Yahuda i gḥessen i lanbeyya i d-iceggeε Yahwa akken ad εeggnen i wegdud yerna ad εerḍen a t-id-rren s abrid-is. Di lemtel, agellid Yucyahu ikker izzazdeg tamurt si leεbada n lekdeb yerna iṣeggem lemqam n Yahwa. Asmi i ufan adlis n Lqanun i d-imudd Ṛebbi sɣur Musa, yenhewwal wul n ugellid-agi. Annect-a yewwi-t ad ikemmel s lḥir ccɣel-nni i gebda.

Acu kan, igelliden i t-id-iḍefren ur tbiεen ara lemtel yelhan i sen-d-yeǧǧa. Yahwa iεemmed ihi i wat Babil ad ẓedmen ɣef Yahuda w’ad hudden Yarucalim d lemqam-is. Wid imenεen wwin-ten d imenfiyen ɣer Babil. Ṛebbi icar-ed belli neffu-yagi ad yekk 70 iseggasen. Di lweqt-agi meṛṛa, tamurt n Yahuda tuɣal d lxali. Mi d-ilḥeq lawan, agdud iţţuserreḥ ad yuɣal ɣer tmurt-is.

Lameεna, ur yeţţuɣal ara ad iḥkem ugellid i d-yekkan si lǧedra n Dawed alamma yusa-d Wemsellek-nni i gewεed Ṛebbi, yeεni Lmasiḥ. Amur ameqran n igelliden yeqqimen ɣef ukersi n lḥekma n Dawed di Yarucalim fkan-d ţţbut belli imdanen ur nekmil ara ur zmiren ara ad ḥekmen. Ala Lmasiḥ i gzemren ad ixdem aya. Atan ihi ayɣer i yenna Yahwa i ugellid aneggaru i d-yeflalin seg uẓar n Dawed: “Kkes taεeṣṣabt. [...] Bla ccekk, ayagi ur yeţţili i ḥedd alamma yusa-d win yesεan lḥeqq yeţţalas, yerna a s-t-fkeɣ s ṣṣeḥ.”—Ḥizqiyal 21:26, 27.

—Ayagi yers ɣef 1 Igelliden; 2 Igelliden; 2 Amezruy ixef wis 10 alamma d wis 36; Irmiya 25:8-11.