DI ZZMAN n igelliden n Isṛayil akk-d Yahuda, lanbeyya n Ṛebbi llan d wid i d-yufraren ger lεibad nniḍen. Irgazen-agi yesεan liman ţ-ţirrugza itεeddan ţberriḥen ayen i d-yenna Ṛebbi. Atnan ṛebεa ixemmimen yesεan azal iɣef i d-mmeslayen:

1. Nnger n Yarucalim. Kra n lanbeyya n Ṛebbi, am Icεaya d Irmiya, berrḥen aṭas n lweqt, uqbel a d-yeḍru, belli tamdint n Yarucalim aţ-ţenger yerna aţ-ţuɣal d lxali. S imeslayen yesεan lhiba, ssefhmen i lɣaci ayɣer i d-tessas temdint-a zzεaf n Ṛebbi. Imezdaɣ-is steεmlen teddun s yisem n Yahwa, meεna nutni ttabaεen leεbada n lekdeb, fesden yerna d iqehharen.—2 Igelliden 21:10-15; Icεaya 3:1-8, 16-26; Irmiya 2:1-3:13.

2. Agdud ad yuɣal ɣer leεbada n ṣṣeḥ. At Isṛayil llan d imenfiyen di temdint n Babil. Mi εeddan 70 iseggasen, uɣalen ɣer tmurt-nsen yexlan akken ad εiwden i lebni n lemqam n Yarucalim. (Irmiya 46:27; Σamus 9:13-15) Qrib 200 iseggasen uqbel, Icεaya icar-ed belli win ara yesteεmṛen tamdint n Babil ad iţţusemmi Sirus. Icar-ed diɣen belli argaz-agi ad iεemmed i wat Isṛayil ad uɣalen ɣer leεbada n ṣṣeḥ. Icεaya yemla-d ula d ţţawil ur necbi wayeḍ ara yessexdem Sirus akken ad yerbeḥ imenɣi-yagi.—Icεaya 44:24-45:3.

3. Tisin n Lmasiḥ ţ-ţemεict-is ɣef lqaεa. Lmasiḥ a d-ilal di temdint n Bit-Liḥim (Bitelḥem). (Mixa 5:2) Ad yesεu annuz yerna ad yerkeb ɣef weɣyul asm’ara ibeggen iman-is i lɣaci di Yarucalim. (Zaxarya 9:9) Γas d aḥnin yerna d aḥlawan, imdanen ur t-qebblen ara. Ih, amur ameqran seg-sen a t-ḍerrfen. (Icεaya 42:1-3; 53:1, 3) Lmasiḥ ad iqabel lmut qessiḥen. D lmut-agi i ţ-ţaggara n Lmasiḥ? Xaṭi, axaṭer lmut-is a d-tawi ssmaḥ n ddnubat i waṭas n lɣaci. (Icεaya 53:4, 5, 9-12) Ilaq-as ihi a d-yeḥyu si ger lmeggtin.

4. Leḥkem n Lmasiḥ. Imdanen imednuben ur zmiren ara maḍi ad ḥekmen iman-nsen s lehna. Lmasiḥ, neţţa, ad iţţusemmi Ageldun n lehna. (Icεaya 9:6, 7; Irmiya 10:23) Ddaw n leḥkem-is, aţ-ţili lehna ger yemdanen meṛṛa akk-d lehna ger yemdanen d lḥiwan. (Icεaya 11:3-7) Ur yeţţili ara lehlak. (Icεaya 33:24) Ula d lmut aţ-ţɣab. (Icεaya 25:8) Ddaw n leḥkem n Lmasiḥ, lmeyytin a d-ḥyun ɣef lqaεa.—Danyil 12:13.

—Ayagi yers ɣef Icεaya, Irmiya, Danyil, Σamus, Mixa akk-d Zaxarya.