ASMI i yuɣal Bulus d amasiḥi, iberreḥ s leḥṛaṛa lexbaṛ n lxiṛ n Tgelda n Ṛebbi. Argaz-agi yellan zik d axṣim ilaq tura ad iqabel aqhar qessiḥen ula d neţţa. Bulus iṣufer tlata iberdan akken ad iberreḥ, yerna yexdem aya mebla ma yefcel. Yelḥa acḥal d amecwaṛ akken ad iberreḥ lexbaṛ n lxiṛ ɣef Tgelda ara yesseḍrun leqsed n tazwara n Ṛebbi yeεnan imdanen.

Deg yinig-ines (uṣafer-ines) amezwaru, yexdem neţţa d wemdakkel-is Barnabas, Bulus isseḥla di temdint n Listra yiwen wergaz yellan d aquḍar seg wasmi i d-ilul. Dinna, lɣaci εeggḍen belli Bulus d Barnabas llan d iṛebbiten, dɣa bɣan a sen-mudden iseflawen. Acḥal i sen-yewεeṛ ad ḥebsen lɣaci-yagi! Ssyin, ixṣimen n Bulus demmren ahdum-agi akken a t-ṛejmen. Γas akken qrib i t-nɣan, Bulus yuɣal-ed ɣer temdint-agi akken ad iṣebber inelmaden s lehduṛ isseǧhaden.

Imasiḥiyen i d-yekkan si laṣel n Iyahudiyen qqaren belli lmumnin ur nelli ara d Iyahudiyen ilaq-asen ad tebεen kra n yeḥricen n Lqanun n Musa. Ihi, Bulus iṛuḥ ɣer Yarucalim ad iciweṛ imceggεen d imasiḥiyen nniḍen iccurfen ɣef temsalt-agi. S usenqed lqayen n Tira Iqedsen akk-d uwelleh n ṛṛuḥ iqedsen n Ṛebbi, irgazen-agi uran i tjemmuyaε ad xḍunt i leεbada n lmeṣnuεat, i zzna, i tissit n idammen akk-d wučči n weksum ur nemzil ara. Lameεna, ɣas lumuṛ-agi d “ayen ilaqen”, win ara ten-itebεen ur yelzim ara a s-yini belli ilaq ad iḍfer Lqanun n Musa.—Lecɣal 15:28, 29.

Deg yinig-ines wis sin, Bulus iṛuḥ ɣer temdint n Biri (i d-iṣebḥen ass-agi di Lyunan). Iyahudiyen n temdint-a qeblen s lfeṛḥ aselmed-ines. Ssenqaden yal ass Tira Iqedsen akken ad walin ma iṣeḥḥa uselmed-agi neɣ ala. Lameεna, ula syenna ilaq-as ad iṛuḥ axaṭer yeţwaqher. Ihi yeṭṭef abrid ɣer temdint n Atinya. Zdat n yiwet n terbaεt n wat Atinya yeɣran xilla, Bulus ixdem lxeṭba yesεan lqewwa. Yehdeṛ s sshala, s lemḥadra d leεqel. Swakka iǧǧa-d lemtel ifazen.

Γer taggara n yinig-ines wis tlata, Bulus yuɣal ɣer Yarucalim. Mi yella di lemqam, kra n Iyahudiyen demmren lɣaci a d-kkren ɣer Bulus akken a t-nɣen. Acu kan, iεsekṛiwen n Ṛuma ḥudden-t, mbeεd wwin-t akken a t-steqsin. Imi yesεa Bulus laṣel aṛumani, yezmer ad idafeε ɣef yiman-is zdat n lḥakem aṛumani Filiks. Iyahudiyen ur zmiren ara a d-fken ţţbut ɣef wayen i s-sbabben. Γer zdat, d Fistus i guɣalen d aneḥkam deg umur n Filiks. Iwakken ur t-iţsellim ara Fistus-agi ger ifassen n Iyahudiyen, Bulus yenna: “Ad rẓeɣ ccṛeε ɣer Qayṣer!” Fistus yerra-yas: “Aţ-ţeţţucaṛεeḍ zdat Qayṣer!”—Lecɣal 25:11, 12.

Wwin ihi Bulus ɣer Ṭelyan s lbabuṛ akken ad iţţucaṛeε. Meεna, lbabuṛ iɣef yerkeb yeɣreq, dɣa iţţuḥettem ad isεeddi ccetwa di tegzirt n Malṭa. Di Ṛuma yeqqim εamayen deg yiwen wexxam i d-yekra. Γas akken iεuss-it yiwen uεsekṛiw aṛumani, amceggeε Bulus ikemmel s leḥṛaṛa aberreḥ ɣef Tgelda n Ṛebbi i kra n win i d-yusan a t-iẓer.

—Ayagi yers ɣef Lecɣal 11:22–28:31.