ƐISA iberreḥ yerna yesselmed lɣaci telt snin d nnefṣ. Tura yeẓra belli tewweḍ-​ed taggara n tudert-​is ɣef lqaɛa. Lɛulama n ddin n Iyahudiyen mcawaṛen akken a t-​nɣen, lameɛna ugaden a d-​yekker wegdud imi i geḥseb Ɛisa d nnbi. Yuɣ lḥal, m’akken iḍerru wayagi meṛṛa, Cciṭan idemmer Yudas n Qeryut yellan d yiwen si 12 n yemceggɛen n Ɛisa akken a t-​ixdeɛ. Lɛulama n ddin msewwaqen d Yudas a s-​fken 30 iṣurdiyen n lfeṭṭa.

Iḍ aneggaru uqbel lmut-​is, Ɛisa yennejmaɛ neţţa d yemceggɛen-​is akken ad ɛeggden Lɛid n Usuref. Issufeɣ Yudas, mbeɛd yesbedd yiwen uɛegged ajdid yeţţusemman Imensi n Wesmekti (neɣ Imensi n Ssid). Iddem-​ed aɣrum, yedɛa ɣer Ṛebbi yerna yesɛedda-​t ger ifassen n 11 n yemceggɛen i d-​iqqimen. Yenna: “Aɣṛum-​agi d lǧeţţa-​w ara fkeɣ fell-​awen [...]. Sya d asawen xeddmet akkagi akken ad iyi-​d-​teţmektayem.” Iddem-​ed tabuqalt n ccṛab, yexdem akken yexdem d weɣrum-​nni, mbeɛd issefhem-​asen: “Tabuqalt-​agi, d leɛqed ajdid s idammen-​iw ara yazzlen fell-​awen.”—Luqa 22:19, 20.

Deg yiḍ-​agi aneggaru, Ɛisa yesɛa aṭas n leḥwayeǧ ara yini i yemceggɛen-​is. Ifka-​yasen lameṛ ajdid: ad myeḥmalen wway gar-​asen mebla ma nudan ɣef nnfeɛ-​nsen. Yenna-​yasen: “Ma temyeḥmalem wway gar-​awen, lɣaci meṛṛa a kkun-ɛeqlen belli d inelmaden-​iw i tellam.” (Yuḥenna 13:34, 35) Inha-​ten diɣen akken ur ţţaǧǧan ara tidyanin iṣeɛben, ara d-​yasen, ad cebblent ulawen-​nsen. Idɛa ɣer Ṛebbi fell-​asen seg wul-​is meṛṛa. Ɣer taggara, Ɛisa d yemceggɛen-​is ḥemden Ṛebbi s ccnawi, dɣa ffɣen deg yiḍ-​nni.

Di tmazirt n Jitsimani, Ɛisa yeɣli ɣef tgecrar, yeẓẓull s lǧehd. Cwiṭ n lweqt umbeɛd, usan-​d izumal n lɣaci s leslaḥ, gar-​asen iɛsekṛiwen d lmuqeddmin, akken a t-​ḥebsen. Yudas iqerreb ɣer Ɛisa, yessuden-​it akken ad ɛeqlen wid i d-​yeddan yid-​es belli d neţţa i d Ɛisa. Mi t-​urzen yeɛsekṛiwen, imceggɛen-​is rewlen.

Deg wexxam ameqran n ccṛeɛ, Ɛisa yenna-​d belli d Mmi-​s n Ṛebbi i gella. Wid i t-​icuṛɛen ḥesben belli yekfeṛ yerna yuklal lmut. Wwin-​t ihi zdat n uneḥkam Bunṭus Bilaṭus. Ɣas ur s-​d-​issukkes acemma, ifka-​t i lɣaci-​nni i gebɣan lmut-​is.

Umbeɛd, wwin Ɛisa ɣer tiɣilt n Gulguṭa anda i t-​semmṛen yeɛsekṛiwen n Ṛuma ɣef tgejdit (wejgu). S lbeṛhan, yeɣli-​d ṭṭlam ɣef tmurt deg uzal qayli. Mi gɛedda ciṭ n lweqt di tmeddit-​nni, Ɛisa yemmut, dɣa twet zzelzla annect-​ila-​ţ. Umbeɛd, rran lǧeţţa-​s deg uẓekka yeɣzen di lɣar. Azekka-​nni ṣṣbeḥ, lmuqeddmin ɣelqen lɣar-​nni yerna sbedden iɛessasen zdat-​es. Ɛisa, ad yeqqim deg uẓekka? Ala. Atan akken kan ara yeḍru lbeṛhan werǧin neḍri di ddunit.

—Ayagi yers ɣef Matta ixef wis 26 d wis 27; Marqus ixef wis 14 d wis 15; Luqa ixef wis 22 d wis 23; Yuḥenna ixef wis 12 alamma d wis 19.