ƐEDDAN tura wazal n 350 iseggasen segmi i d-​yeɣli uḥemmal-​nni n waman. Yiwen n wergaz, iţţusemman Abṛaham, yezdeɣ di temdint n Ur. Tamdint-​agi ideg yella liser, teṣbeḥ-​ed di tmurt iwumi i neqqar ass-​a Lɛiraq. Abṛaham yesɛa liman d ameqran. Lameɛna, yiwen wass yeţţujeṛṛeb liman-​is.

Yahwa yenna-​yas ad yeǧǧ tamurt ideg ilul akken ad iṛuḥ ɣer Kanɛan, yiwet n tmurt tabeṛṛanit. Abṛaham yuɣ awal mebla astehzi. Deg uṣafer-​agi iḍulen, Abṛaham yewwi yid-​es tameṭṭut-​is Ṣara, mmi-​s n gma-​s Luṭ akk-​d waṭas n iqeddacen-​is. Mi wwḍen ɣer tmurt n Kanɛan, ɛacen deg iqiḍunen. Di leɛqed i gesbedd neţţa d Abṛaham, Yahwa iwɛed-​as a t-​yerr d lǧens ameqran yerna tiwaculin meṛṛa n lqaɛa ad ţţubarkent yis. Yeggull-​as daɣen belli tarwa-​s aţ-​ţekseb tamurt n Kanɛan.

Abṛaham d Luṭ ɛumen di lxiṛ. Kessben rennun tiqeḍɛiyin n wakraren d ubeqri. Imi yelha wul-​is, Abṛaham yeǧǧa mmi-​s n gma-​s ad yextiṛ amḍiq i gebɣa. Luṭ iṛuḥ ihi ad yezdeɣ deg yiwen uzaɣar, i d-​yeţţaken nneɛma, iwumi i qqaren Uṛdun. Azaɣar-​agi iṣbeḥ-​ed ɣer tama n temdint n Sudum. Irgazen n temdint-​agi fesden aṭas. Ɛuṣan Ṛebbi s ddnubat-​nsen imeqranen.

Mi gɛedda kra n lweqt, Yahwa Ṛebbi yewɛed tikkelt nniḍen i Abṛaham belli tarwa-​s aţ-​ţeṭṭuqqet am yetran. Lameɛna, xas akken Abṛaham yeţkel ɣef lemɛahda-​yagi, taɛzizt-​is Ṣara mazal ur s-​d-​tesɛi ara dderya. Mi gewweḍ Abṛaham 99 n sna, Ṣara azal n 90, Ṛebbi iḍmen-​iten a d-​sɛun aqcic. D ayen i geḍran. Ṣara tesɛa-​d Isḥaq, akken i t-​id-​yenna Ṛebbi. Abṛaham yesɛa-​d dderya nniḍen, lameɛna si lǧedra n Isḥaq ara d-​yekk Wemsellek-​nni i gewɛed Ṛebbi di Ɛidin.

Luṭ, neţţa, yezdeɣ tura akk-​d twacult-​is di temdint n Sudum. Imezdaɣ n temdint-​a fesden mačči d kra. Lameɛna, Luṭ d aḥeqqi, ur yuɣal ara am nutni. Uqbel a d-​yesseɣli lɛiqab ɣef Sudum, Yahwa iceggeɛ lmalayek akken ad xebbṛent Luṭ ɣef nnger ur neţɛeṭṭil ara a d-​yeɣli. Lmalayekkat-​agi sḥirent Luṭ ţ-​ţwacult-​is akken ad rewlen mebla ma zzin ɣer deffir. Umbeɛd, Ṛebbi yesseɣli-​d times d ukebri seg igenni ɣef Sudum akk-​d yiwet n temdint i ţ-​iqerben iwumi qqaren Gumur. Issenger imezdaɣ meṛṛa n temdinin-​agi ifesden. Luṭ d snat yessi-​s ţţusellken. Lameɛna tameṭṭut-​is, neţţat, tdewweṛ ɣer deffir axaṭer tendem ahat deg wayen i teǧǧa. Imi ur tuɣ ara awal, temmut.

—Ayagi yers ɣef Laṣel n ddunit 11:10–19:38.