UQBEL akk a d-yexleq imdanen, Ṛebbi ixleq-ed aṭas n lexliqat ur nezmir ara a nwali, iwumi i neqqar lmalayek. Lameεna yiwet seg-sent, i geţţusemman umbeεd Cciṭan Iblis, tεuṣa Ṛebbi. Di leǧnan n Σidin, Cciṭan-agi ijeṛṛeb Ḥewwa. Yewwi-ţ s tḥila aţ-ţečč si ttejṛa-nni akken i sen-iḥeṛṛem Ṛebbi.

Cciṭan yessexdem azrem akken ad yehdeṛ i Ḥewwa. Yewwi-ţ aţ-ţɣil belli Ṛebbi ikkes-asen i neţţat d wergaz-is ayen yelhan. Yenna-yas ur ţmeţţaten ara ma ččan si lfakya-nni i sen-iḥeṛṛem Ṛebbi. S wannect-a, am wakken yenna-d belli Ṛebbi yeskaddeb i Adam d Ḥewwa. Aɣeddar-agi yerra aεaṣi i Ṛebbi amzun d abrid n rrbeḥ i geţţawin ɣer tmusni ţ-ţlelli. Lameεna annect-a meṛṛa ţ-ţikerkas! Ih, d wagi i d lekdeb akk amezwaru di ddunit. Di temsalt-agi, atnan ihi yesteqsiyen n ṣṣeḥ yeffren deffir n lehduṛ n Cciṭan: Ṛebbi yeţţalas ad yeḥkem ɣef txelqit meṛṛa? Iḥekkem s lḥeqq? Iḥekkem i nnfeε n yemdanen?

Ḥewwa tumen Cciṭan. Teḍmeε lfakya-nni, dɣa tečča seg-s. Umbeεd, tefka-ţ i wergaz-is i geččan ula d neţţa. Swakka, uɣalen d imednuben. Izmer lḥal a s-nini ulac deg wayen akka i xedmen, lameεna di tin n ṣṣeḥ d aεaṣi i εuṣan Ṛebbi. Imi xtaṛen ad εaṣin Axellaq-nsen, Adam d Ḥewwa sseknen-d belli ugin leḥkem n Win i sen-yefkan kullec. Yiwet si tikciwin-agi ţ-ţudert ikemlen.

Ṛebbi iḥuseb imεaṣiyen-agi. Yewεed a d-tas yiwet n Zzerriεa neɣ Amsellek ara yekksen Cciṭan-nni i geffren deffir n wezrem. Imi Ṛebbi d aḥnin, ur yenɣi ara imir imir Adam d Ḥewwa. Swakka, zemren a d-sεun dderya. Dderya-yagi aţ-ţesεu asirem: amceggeε n Ṛebbi ad imḥu lemḍerra i d-tewwi lmeεṣegga di leǧnan n Σidin. Amek ara issiweḍ Ṛebbi ayen i geqsed a t-yexdem? Anwa-t Wemceggeε-agi ara yilin d Amsellek? Lǧawab i yesteqsiyen-a iţban-ed cwiṭ cwiṭ deg Wedlis Iqedsen.

Ṛebbi yeqceε Adam d Ḥewwa si Lǧennet. Di beṛṛa n leǧnan n Σidin, ilaq-asen tura ad xedmen akal alamma cerwen-ţ merrɣet. Umbeεd, Ḥewwa terfed s tadist, tesεa-d Kayin, mmi-tsen amenzu. Ssyin d asawen, Adam d Ḥewwa rnan-d arrac ţ-ţullas, gar-asen Habil akk-d Cit yellan d jedd n Nuḥ.

—Ayagi yers ɣef Laṣel n ddunit ixef wis 3 alamma d wis 5; Aweḥḥi 12:9.