ṚEBBI ixleq-​ed tanezduɣt ikemlen i yemdanen: lqaɛa. Awal-​is yenna-​d: “Igenwan d ayla n Yahwa, ma d lqaɛa, ifka-​ţ-​id i warraw n yemdanen.”​—Ahellil 115:16.

Uqbel a d-​ixleq Ṛebbi argaz amezwaru, Adam (Adem), yextaṛ yiwen n wemkan amecṭuḥ ɣef lqaɛa yeţţusemman Ɛidin akken ad ixdem deg-​s yiwen n leǧnan (tebḥirt) icebḥen. Tira Iqedsen nnant-​ed belli ffɣen-​d isaffen si leǧnan-​agi. a Sin seg-​sen ţţusemman Faṛat d Ḥidiqil. Kra qqaren belli leǧnan-​agi n Ɛidin yella zik deg wemḍiq i d-​iṣebḥen ass-​a di ccerq n Tuṛk. Ih, leǧnan n Ɛidin yella s ṣṣeḥ zik ɣef lqaɛa!

Ṛebbi ixleq-​ed Adam, issers-​it di leǧnan-​agi yerna yessuter-​as “a t-​ixdem w’a d-​ilhu deg-​s.” (Laṣel n ddunit 2:15) Iɛedda kra n lweqt, Ṛebbi ixleq-​ed tameṭṭut i Adam yeţţusemman Ḥewwa. Yumeṛ-​asen: “Arwet, ftit, ččaṛet lqaɛa yerna steɛmṛet-​eţ.” (Laṣel n ddunit 1:28) Akken i d-​iban lḥal, Ṛebbi ur ixdim ara lqaɛa “bla ssebba”, lameɛna ixdem-​iţ “akken aţ-​ţeţwazdeɣ.”​—Icɛaya 45:18.

Acu kan, Adam d Ḥewwa ɛuṣan Ṛebbi m’akken ur uɣen ara awal i lqanun-​is s ţɛemda. Ṛebbi iqceɛ-​iten-​id ihi si leǧnan-​nni n Ɛidin. Lǧennet tṛuḥ-​asen. Meɛna ddnub n Adam yewwi-​d lemḍerrat nniḍen. Tira Iqedsen nnant-​ed: “Ddnub ikcem-​ed ɣer ddunit s yiwen wemdan, amdan-​agi d Adem; ddnub-​agi yewwi-​d lmut, lmut teţţawi akk imdanen, axaṭer imdanen meṛṛa denben.”​—At Ṛuma 5:12.

Yahwa yerra deg yidis ayen akken yeqsed a t-​ixdem di tazwara, yeɛni lqaɛa ara yuɣalen d lǧennet anda ara zedɣen yemdanen iseɛdiyen? Xaṭi. Yenna-​d: “Awal-​iw i d-​iţeffɣen seg yimi-​w ur d-​iţţuɣal ara ɣur-​i mebla lfayda, lameɛna ala tuwwḍin ara yaweḍ ɣer wayen ideg yella lfeṛḥ-​iw, yerna bla ccekk, ad yaweḍ ɣer wayen i t-​ceggɛeɣ.” (Icɛaya 55:11) Ṛebbi a d-​yerr ihi Lǧennet ɣef lqaɛa!

Amek ara tili temɛict di Lǧennet? Dewweṛ tawerqeţ-​agi akken aţ-​ţwaliḍ ayen i d-​weɛdent Tira Iqedsen.