Ishel-​ak aţ-​ţeţţaɣeḍ daymen awal i baba-​k d yemma-​k?— Tikwal yewɛeṛ. Teẓriḍ belli Ɛisa yella yeţţaɣ awal i Yahwa akk-​d imawlan-​is?— Lemtel-​ines yezmer a k-​iɛiwen aţ-​ţeţţaɣeḍ awal i baba-​k d yemma-​k ɣas iwɛeṛ-​ak lḥal. Eyya-​d a nẓer amek.

Uqbel a d-​yas Ɛisa ɣer lqaɛa, yella yeţɛici deg igenni akk-​d Baba-​s, yeɛni akk-​d Yahwa. Lameɛna, yesɛa daɣen imawlan asmi yella ɣef lqaɛa, ismawen-​nsen Yusef akk-​d Meryem. Teẓriḍ amek i uɣalen d imawlan-​is?—

Yahwa yeddem-​ed tudert (lḥayat) n Ɛisa seg igenni yerra-​ţ di tɛebbuṭ n Meryem. Akka, ad yizmir Ɛisa a d-​ilal w’ad iɛic ɣef lqaɛa. Tagi d lmuɛǧiza! Ɛisa yimɣur di tɛebbuṭ n Meryem akken i ţţimɣuren llufanat nniḍen di tɛebbuṭ n yemma-​tsen. Tesɛ cchuṛ mbeɛd, ilul-​ed. Akka i uɣalen Yusef d Meryem d imawlan-​is dagi ɣef lqaɛa.

Asmi i gesɛa Ɛisa 12 n sna di leɛmeṛ-​is, yexdem yiwet n lḥaǧa swayes i d-​ibeggen acḥal i gḥemmel Baba-​s, yeɛni Yahwa. Yexdem aya asmi i gṛuḥ ɣer temdint n Yarucalim neţţa d imawlan-​is akken ad sɛeddin lɛid n Usuref. Mi d-​uɣalen Yusef d Meryem, faqen deg webrid belli Ɛisa ur d-​yeddi ara yid-​sen. Teẓriḍ anda i geqqim?—

Yusef d Meryem uɣalen din din ɣer Yarucalim, bdan ţnadin di mkul amkan ɣef Ɛisa. Tqellqen mliḥ imi ur ẓrin ara anda-​t. Meɛna, telt eyyam mbeɛd, ufan-​t di lǧameɛ iqedsen! Teẓriḍ ayɣer i geqqim Ɛisa di lǧameɛ iqedsen?— Axaṭer dinna i gezmer ad yissin leḥwayeǧ ɣef Baba-​s, Yahwa. Iḥemmel Yahwa, yebɣa ad iẓer amek ara t-​issefṛeḥ. Ula d asmi meqqer, yuɣal d argaz, yeqqim dima yeţţaɣ awal i Yahwa. Yuɣ-​as awal ɣas akken iwɛeṛ-​as lḥal, ɣas akken ilaq-​as ad yeţwaqreḥ. Yella yeţţaɣ awal daɣen i Yusef akk-​d Meryem?— D ṣṣeḥ, akka i d-​yenna Wedlis Iqedsen.

Acu i d-​tḥefḍeḍ si lemtel n Ɛisa?— Tḥefḍeḍ-​ed belli ilaq-​ak aţ-​ţeţţaɣeḍ awal i baba-​k d yemma-​k ɣas iwɛeṛ-​ak lḥal. Aţ-​ţxedmeḍ am neţţa?—