Tikwal, m’ara nheddeṛ i lɣaci ɣef Yahwa, ţmesxiṛen fell-​aneɣ neɣ zeɛɛfen. M’ara neţwali annect-​a, nezmer a nebɣu a neḥbes ur nheddeṛ ara. Yella wasmi i k-​d-​teḍra akka i keččini?— Adlis Iqedsen yeḥka-​d ɣef yiwen ilemẓi i gḥemmlen aṭas Yahwa, lameɛna qrib yeḥbes ur iheddeṛ ara fell-​as. Ilemẓi-​yagi isem-​is Irmiya. Eyya-​d a nẓer menhu-​t.

Yiwen wass, Yahwa iḍleb-​as i Irmiya ad iweṣṣi medden akken ur xeddmen ara ayen n diri. D ayen i s-​iweɛṛen mliḥ i Irmiya. Irmiya yugad. Yenna-​yas i Yahwa: “Ur ẓriɣ ara d acu ara sen-​iniɣ. Nekk bezzaf i meẓẓiyeɣ.” Meɛna, Yahwa yerra-​yas-​d: “Ur ţţagad ara. A k-ɛiwneɣ.”

 Irmiya yebda ihi yeqqar i medden belli ad ţţuɛaqben ma yella ur beddlen ara. Amek i twalaḍ, ad beddlen?— Xaṭi. Bdan ţmesxiṛen fell-​as yerna zeɛfen mliḥ. Kra seg-​sen bɣan a t-​nɣen ula ţ-​ţimenɣiwt! Ar ɣur-​ek, amek i gḥuss iman-​is Irmiya?— Imi yugad, yenna: “Ur ţɛawadeɣ ara yakk ad hedṛeɣ ɣef Yahwa.” Dɣa d ṣṣeḥ yeḥbes?— Ala, ur yeḥbis ara. Iḥemmel xilla Yahwa, daymi ur yezmir ara ad yeḥbes lhedṛa fell-​as. Ihi, imi ur yeḥbis ara, Yahwa iḥuder-​it.

Di lemtel, yiwet n tikkelt, kra n lɛibad imcumen ḍeggren Irmiya ɣer lbir yeččuṛen d aluḍ. Ur yesɛi ayen ara yečč wala ayen ara isew. Lɛibad-​agi bɣan a t-​ǧǧen ad yemmet dinna. Lameɛna, iɛawen-​it Yahwa; ur yemmut ara!

Acu i d-​tḥefḍeḍ seg wayen yexdem Irmiya?— Ɣas akken tikwal yella yeţţagad, leɛmeṛ yeḥbis lhedṛa ɣef Yahwa. M’ara teţmeslayeḍ ɣef Yahwa, yezmer lḥal kra n lɛibad ad ţmesxiṛen fell-​ak neɣ ad zeɛfen. Ahat aţ-​ţenneḥcameḍ neɣ aţ-​ţagadeḍ. Acu kan, ɣur-​ek aţ-​ţḥebseḍ ur theddṛeḍ ara ɣef Yahwa. A k-​iţɛawan dima, akken i gɛawen Irmiya.