TIMEΓRI 3
Raḥab tumen s Yahwa
Xayel-ed amzun aql-aɣ di temdint iwumi qqaren Yariḥu. Tamdint-a tella di tmurt n Kanεan. Dinna, lεibad ur ţţamnen ara s Yahwa. Di temdint-agi, tezdeɣ yiwet n tmeṭṭut isem-is Raḥab.
Asmi i tella Raḥab ţ-ţamecṭuḥt, tesla amek i geldi Musa abrid di lebḥeṛ Azeggaɣ, d wamek i d-yessufeɣ At Isṛayil si Maṣer. Tesla daɣen amek i gεawen Yahwa At Isṛayil bac ad rebḥen lgirrat i xedmen akk-d yeεdawen-nsen. Tura, yewweḍ-iţ-id lexbaṛ belli At Isṛayil ur bεiden ara ɣef Yariḥu!
Raḥab teffer ixbaṛǧiyen axaṭer tumen s Yahwa.
Yiwen wass, deg yiḍ, sin n yergazen n wat Isṛayil ṛuḥen ɣer Yariḥu bac ad ẓren s tuffra amek i tga (temmug) temdint-agi. Wid ixeddmen ayagi qqaren-asen ixbaṛǧiyen. Sin yergazen-agi leḥqen ɣer wexxam n Raḥab; teεreḍ-iten ad kecmen w’ad nsen ɣur-es. Deg yiḍ-nni, agellid (sselṭan) n Yariḥu yesla belli usan-d yexbaṛǧiyen ɣer temdint yerna ṛuḥen ɣer wexxam n Raḥab. Ihi, iceggeε irgazen bac a ten-id-ṭṭfen. Raḥab teffer sin yexbaṛǧiyen-nni ɣef ssqef n wexxam-is, mbeεd tenna i yergazen i d-iceggeε ugellid-nni: “Sgellin, ixbaṛǧiyen-nni llan dagi, meεna tura ffɣen si temdint. Ma tṛuḥem tura, tzemrem a ten-tleḥqem!” Teẓriḍ iwacu i tεawen Raḥab sin yexbaṛǧiyen-nni?— Axaṭer tumen s Yahwa yerna teẓra belli ad yefk tamurt n Kanεan i wat Isṛayil.
Uqbel ad ffɣen yexbaṛǧiyen-nni seg wexxam n Raḥab, ggullen-as belli, m’ara thudd Yariḥu, neţţat d wexxam-nsen ad menεen. Teẓriḍ d acu i s-nnan a t-texdem?— Nnan-as: “Ddem amrar-agi azeggaɣ, εelleq-it ɣer ṭṭaq-im. Akka, ad menεen meṛṛa wid ara yilin deg wexxam-im.” Raḥab texdem swaswa ayen i s-nnan yexbaṛǧiyen-nni. Teẓriḍ d acu i geḍran umbeεd?—
Yahwa isellek-ed Raḥab d wexxam-nsen.
Mi εeddan kra n wussan, At Isṛayil leḥḥun ţezzin-d (ddewwiṛen-d) i temdint, bla ma nnan-d awal. Seţţa wussan, nutni ţezzin-as-d i Yariḥu; xeddmen akka yiwet n tikkelt i wass. Meεna, ass wis sebεa, zzin-as-d sebεa tikkal. Umbeεd, εeggḍen (suɣen) mliḥ. Din din, yesseɣli-d Yahwa ṣṣur i d- idewwṛen i temdint. Acu kan, axxam-nni ideg yella wemrar azeggaɣ ur yeɣli ara, ɣas akken yenṭeḍ ɣer ṣṣur-nni! Twalaḍ-t di ţţeswiṛa?— Raḥab d wexxam-nsen menεen!
Acu i d-tḥefḍeḍ si teḥkayt n Raḥab?— Raḥab tumen s Yahwa axaṭer tesla s leḥwayeǧ timeqranin i gexdem. Ula d kečč, tessneḍ aṭas n leḥwayeǧ timeqranin i gexdem Yahwa. Tumneḍ s Yahwa, am Raḥab?— Iban belli tumneḍ!
