TIMEƔRI 11
Uran tiktabin i d-iheddṛen ɣef Ɛisa
Twalaḍ irgazen-agi di ţţeswiṛa?— D Matta, Marqus, Luqa, Yuḥenna, Buṭrus, Yeɛqub, Yahuda akk-d Bulus. Llan meṛṛa ţɛicen deg yiwen n zzman akk-d Ɛisa, yerna uran (ketben) tiktabin n Wedlis Iqedsen i d-iheddṛen fell-as. Eyya-d a nẓer anwi-ten.
Acu i tessneḍ ɣef yergazen-agi?
Tlata seg yergazen-agi llan d imceggɛen i gberrḥen akk-d Ɛisa. Teẓriḍ menhu-ten?— D Matta, Yuḥenna akk-d Buṭrus. Matta akk-d Yuḥenna llan ssnen mliḥ Ɛisa, yerna mkul yiwen deg-sen yura taktabt i d-iḥekkun amek i gɛac Ɛisa. Amceggeɛ Yuḥenna yura daɣen taktabt n Uweḥḥi akk-d tlata tebṛatin: Yiwen Yuḥenna, Sin Yuḥenna akk-d Tlata Yuḥenna. Amceggeɛ Buṭrus yekteb snat n tebṛatin: Yiwen Buṭrus akk-d Sin Buṭrus. Di tebṛaţ tis snat, yeḥka-d belli Yahwa ihdeṛ-ed yiwen wass seg igenni, yenna-d ɣef Ɛisa: “Wagi d mmi. Ḥemmleɣ-t, yerna feṛḥeɣ yis.”
Irgazen-agi nniḍen yellan di ţţeswiṛa hedṛen-aɣ-d daɣen ɣef Ɛisa di tektabin-nsen. Yiwen seg-sen d Marqus. Ahat yeḥdeṛ asmi i ṭṭfen Ɛisa yerna iwala ayen akk i geḍran. Yella daɣen Luqa. Luqa d ṭṭbib. Ad yili yuɣal d amasiḥi mbeɛd mi gemmut Ɛisa.
Sin yergazen nniḍen i teţwaliḍ di ţţeswiṛa, d atmaten n Ɛisa. Tessneḍ ismawen-nsen?— Yiwen d Yeɛqub, wayeḍ d Yahuda. Ussan imezwura, ur uminen ara s Ɛisa. Ḥesben-t yehbel cwiyya. Lameɛna, mi gɛedda lweqt, umnen yis yerna uɣalen d imasiḥiyen.
Yegra-d di ţţeswiṛa yiwen kan n wergaz: d Bulus. Uqbel ad yuɣal d amasiḥi, yella isem-is Cawul. Yekṛeh imasiḥiyen yerna yewɛeṛ mliḥ yid-sen. Teẓriḍ ayɣer i gebɣa Bulus ad yuɣal d amasiḥi?— Yiwen wass, yella ileḥḥu deg webrid, ddqiqa kan yesla i yiwen a s-d-iheddeṛ seg igenni. D Ɛisa i s-d-iheddṛen! Yenna-yas-d: “Ayɣer akka i tweɛṛeḍ akk annect-a d wid yeţţamnen yis-i?” Seg yimiren, Bulus ibeddel, dɣa yuɣal d amasiḥi. Yura 14 n tektabin n Wedlis Iqedsen: seg Iṛumaniyen alamma d Iɛebṛaniyen.
Neqqar Adlis Iqedsen kul ass, yak d ṣṣeḥ?— M’ara neqqar Adlis Iqedsen, neţţissin xilla n leḥwayeǧ ɣef Ɛisa. Tebɣiḍ aţ-ţissineḍ akteṛ n leḥwayeǧ ɣef Ɛisa?—
