Neḥwaǧ meṛṛa idrimen akken a nɛeggec tawacult-​nneɣ. (Lemtul 30:8) Adlis Iqedsen yeqqar-​ed belli “ţḥaraben yedrimen.” (Amusnaw 7:12, Ṭrejma n ddunit tajdiṭ, s tṛumit) Iwɛeṛ-​awen ahat aţ-​ţhedṛem di sin ɣef yedrimen, lameɛna ur ţţaǧǧat ara iṣurdiyen a d-​ssekren ccwal gar-​awen. (Ifasusiyen 4:32) Ilaq ad yili laman ger wergaz ţ-​ţmeṭṭut-​is yerna ad ţţaṭṭafen ṛṛay jmiɛ ɣef wamek ara ţṣerrifen idrimen-​nsen.

AYEN I D-​IQQAR WEDLIS IQEDSEN: “Anwa deg-​wen, ma yebɣa ad ibnu lbeṛǧ ur iţɣimi ara qbel ad issali leḥsab, iwakken ad iẓer ma yezmer a t-​ikfu?” (Luqa 14:28) Yelha-​yawen aţ-​ţeţxemmimem lwaḥid ɣef wamek ara teţṣerrifem idrimen-​nwen. (Ɛamus 3:3) Ẓret d acu i teḥwaǧem d wacḥal i wen-​ilaqen bac aţ-​ţqablem ayagi. (Lemtul 31:16) Mačči kan imi tesɛam ayen swayes ara d-​taɣem lḥaǧa, dɣa ilaq-​awen a ţ-​id-​taɣem. Ḥadret aţ-​ţeţwalasem; ţṣerrifet ayen kan i tesɛam. —Lemtul 21:5; 22:7.

AYEN I TZEMREḌ AŢ-​ŢXEDMEḌ:

• Ma gran-​awen-​d yedrimen ɣer taggara n ccheṛ, ẓer kečč ţ-​ţmeṭṭut-​ik d acu ara txedmem yis-​sen

• Ma yella xuṣṣen-​ken yedrimen, nadit d acu ara txedmem swaswa bac aţ-​ţessenqsem ameṣruf. Di lemtel, axiṛ a d-​teţheggim ayen ara teččem, wala aţ-​ţeţṛuḥum a d-​taɣem si beṛṛa lmakla iweǧden

AYEN I D-​IQQAR WEDLIS IQEDSEN: “Neţnadi ayen yelhan mačči kan zdat n Yillu, lameɛna ula zdat n yemdanen.” (2 Ikurintiyen 8:21) Heddeṛ ṣṣeḥ i tmeṭṭut-​ik ɣef wayen i d-​trebbḥeḍ d wayen i tetṣerrifeḍ.

Ţţemcawaṛet dima kečč ţ-​ţmeṭṭut-​ik uqbel ad yeṭṭef yiwen deg-​wen leqrar ameqran yeɛnan ameṣruf. (Lemtul 13:10) Ma yella theddṛem akken ilaq wway gar-​awen ɣef temsalt-​agi, ad yeqqim zzwaǧ-​nwen dima ihenna. Ur ḥeţţeb ara idrimen i k-​d-​ikeččmen amzun d ayla-​k weḥd-​ek, meɛna ḥseb-​iten d ayla n twacult meṛṛa.—1 Timutawus 5:8.

AYEN I TZEMREḌ AŢ-​ŢXEDMEḌ:

• Msefham ţ-​ţmeṭṭut-​ik ɣef wacḥal i gezmer ad iṣerref yal yiwen deg-​wen mebla ma icaweṛ wayeḍ

• Ur ţṛaǧu ara alamma yeḍra-​d wugur bac aţ-​ţhedṛeḍ ţ-​ţmeṭṭut-​ik ɣef yedrimen