Asmi i tzewǧeḍ, txelqeḍ-​d tawacult tajdiṭ. Iban belli ilaq aţ-​ţḥemmleḍ imawlan-​ik yerna a ten-​teţqadareḍ dima; meɛna tura, ţ-​ţin ukud i tzewǧeḍ i gesɛan azal akk ameqran ɣur-​ek di ddunit. Kra seg yeqriben-​ik iwɛeṛ-​asen ahat ad qeblen ayagi. Acu kan, imenzayen n Wedlis Iqedsen zemren a k-ɛiwnen a d-​tafeḍ lmizan iwulmen iwakken, si tama, aţ-​ţiliḍ di lehna d yeqriben-​ik, si tama nniḍen, aţ-​ţxeddmeḍ ayen ilaqen bac aţ-​ţesseǧhdeḍ lɛalaqa-​inek ţ-​ţwacult-​ik tajdiṭ.

AYEN I D-​IQQAR WEDLIS IQEDSEN: “Ɛuzz baba-​k d yemma-​k.” (Ifasusiyen 6:2) Akken yebɣu yili leɛmeṛ-​ik, ţɛuzzu yerna ţqadar dima imawlan-​ik. Steɛṛef belli ula ţ-​ţameṭṭut-​ik ilaq aţ-​ţerr ddehn-​is ɣer imawlan-​is. Imi “leḥmala ur tesɛi ara tismin”, ur ḥeţţeb ara belli lɛalaqa i tesɛa yid-​sen a k-​d-​tawi lemḍerra.—1 Ikurintiyen 13:4, Awal n tudert, 2001; Igalatiyen 5:26.

AYEN I TZEMREḌ AŢ-​ŢXEDMEḌ:

• Di lemtel, xḍut kečč ţ-​ţmeṭṭut-​ik i lehduṛ am wigi: “Imawlan-​im dima kkaten deg-​i” neɣ “Yemma-​k ur tḥemmel ara maḍi ayen i xeddmeɣ”

• Nadi aţ-​ţwaliḍ leḥwayeǧ akken i tent-​teţwali tmeṭṭut-​ik

AYEN I D-​IQQAR WEDLIS IQEDSEN: “Argaz ad yeǧǧ baba-​s d yemma-​s, ad ilseq ɣer tmeṭṭut-​is, dɣa ad uɣalen d yiwet n lǧeţţa.” (Laṣel n ddunit 2:24) Ɣas akken tzewǧeḍ, izmer lḥal imawlan-​ik mazal ţḥussun amzun d lwaǧeb fell-​asen a d-​lhun yid-​ek, dɣa a d-​ssekcamen iman-​nsen di zzwaǧ-​ik akteṛ n wayen ilezmen.

D kečč ţ-​ţmeṭṭut-​ik ara yeṭṭfen leqrar bac a d-​tḥuddem tilas gar-​awen d imawlan-​nwen; ssyin a sen-​tessefhmem s leḥnana d acu-​tent tilas-​agi. Tzemrem a sen-​tinim qbala ayen yellan mebla ma tqerḥem-​ten. (Lemtul 15:1) S wannuz d leḥnana akk-​d ṣṣber, aţ-​ţesbeddem lɛalaqa yelhan d yeqriben-​nwen yerna “aţ-​ţeţţemyawim gar-​awen s leḥmala.”—Ifasusiyen 4:2.

AYEN I TZEMREḌ AŢ-​ŢXEDMEḌ:

• Ma twalaḍ belli bezzaf i d-​ssekcamen imawlan-​ik iman-​nsen di temɛict-​nwen, hdeṛ ɣef wannect-​a akk-​d tmeṭṭut-​ik di teswiɛt ihennan

• Mtafaq yid-​es ɣef wamek ara tefrum tamsalt-​agi