Dawed yeɣleb Gulyat axaṭer yeţkel ɣef Yahwa (1Cam 17:45). Yahwa yebɣa a d-yessken lǧehd-is i mkul yiwen seg iqeddacen-is (2Amz 16:9). Amek i nezmer a d-nbeggen belli neţkalay ɣef lemɛawna i ɣ-d-iţţak Yahwa wala ɣef tezmert-nneɣ, neɣ ɣef wayen i nessen? Atnan tlata n ţţawilat:

• Ţẓalla dima. Ur ţẓalla ara kan bac ad ţwaɛfun ddnubat-ik, meɛna ţẓalla daɣen abeɛda iwakken aţ-ţesɛuḍ tazmert swayes ara tqableḍ ajeṛṛeb (Mt 6:12, 13). Ur s-ṭṭalab ara kan i Yahwa ad ibarek ṛṛay i teṭṭfeḍ, meɛna ḍleb-as a k-iwelleh yerna a k-d-yefk lekyasa uqbel aţ-ţeṭṭfeḍ kra n ṛṛay (Yeɛ 1:5).

• Qqar Adlis Iqedsen yerna ţmeyyiz fell-as. Qqar Adlis Iqedsen yal ass (Ahl 1:2). Ţmeyyiz ɣef lemtel n iqeddacen n zik n Ṛebbi, i neţţaf deg Wedlis Iqedsen, yerna ssexdam di temɛict-ik n yal ass ayen i d-tḥefḍeḍ (Yeɛ 1:23-25). Uqbel aţ-ţebduḍ aberreḥ, ţheggi iman-ik; ur ţkalay ara kan ɣef yiman-ik. Bac a d-tesfaydiḍ akken ilaq seg inejmuɛen, yelha a ten-tessewǧadeḍ uqbel.

• Ţţaɣ awal i tuddsa n Yahwa. Ilaq aţ-ţiliḍ dima tɛelmeḍ s lexbaṛat ineggura i d-teţţak tuddsa n Yahwa yerna a ten-tessexdameḍ mebla leɛḍil (Anẓ 9:17). Smeḥsis i lecyux n tejmaɛt m’ara d-fken kra n lumuṛ neɣ kra n lewṣayat (Ɛeb 13:17).

FERREǦ BIDYU YEŢŢUSEMMAN N’AIE PAS PEUR DE LA PERSÉCUTION, MBEƐD ǦAWEB-ED ƔEF YESTEQSIYEN-AGI:

• Acu-tent leḥwayeǧ yemxallafen i ugaden watmaten ţ-ţyessetmatin-agi?

• D acu i ten-iɛawnen akken ad ɣelben tugdi-nsen?