Ṣṣber i geṣber Yahwa i ddunit, qrib ad yaweḍ ɣer lḥedd-is. Ddin n lekdeb ad yeţwanger, tiddukla n leǧnas aţ-ţeẓdem ɣef wegdud n Ṛebbi, yerna di lgirra n Harmagidun, Yahwa ad issenger imcumen. Imasiḥiyen ţṛaǧun s lḥir tidyanin-agi i gesɛan azal.

Iban, ur neẓra ara ayen ara yeḍrun s ţfaṣil di leɛtab ameqran n taggara n ddunit. Ɣef lemtel, ur neẓra ara swaswa melmi ara yebdu, ur neẓra ara ssebbat ara yawin lḥukumat ad ẓedment ɣef ddyanat. Ur neẓra ara acḥal n lweqt ara idum weẓdam n leǧnas ɣef wegdud n Ṛebbi, d wayen ara xedmen. Ur neẓra ara daɣen swaswa amek ara yessenger Yahwa imcumen di Harmagidun.

Lameɛna, Adlis Iqedsen yeqqar-aɣ-d ayen akk i neḥwaǧ a nissin akken a nqabel s leţkal d lkuṛaǧ ayen ara yeḍrun ɣer zdat. Ɣef lemtel, neẓra belli neţɛici taggara n “wussan ineggura” (2Tim 3:1). Neẓra belli aẓdam ara yilin ɣef ddyanat ad ‘yeţwanqes’ iwakken ddin n ṣṣeḥ ur inegger ara (Mt 24:22). Neẓra belli Yahwa ad isellek agdud-is (2Buṭ 2:9). Neẓra daɣen belli win i gextaṛ Yahwa akken ad issenger imcumen w’ad iḥareb ɣef ihedman n lɣaci di Harmagidun, yella d aḥeqqi yerna yeǧhed (Awe 19:11, 15, 16).

Bla ccekk, tidyanin ara yeḍrun ɣer zdat ad ssexlɛent lɣaci. Meɛna, nekni imi neɣra yerna nmeyyez ɣef teqsiḍin anda i gsellek Yahwa agdud-is, akk-d wayen ara yeḍrun ɣer zdat, a ‘nekker, w’a nerfed aqerru-nneɣ’ axaṭer netḥeqqeq belli leslak-nneɣ iqerreb-ed (Lq 21:26, 28).