Di ccheṛ n ctambeṛ a nexdem ayen akk umi nezmer akken a nini i lɣaci meṛṛa ad ɣren Adlis Iqedsen yid-neɣ s treẓẓit Aţ-ţɛiceḍ i dayem! Tzemreḍ aţ-ţeṭṭfeḍ leqdic n unaram amɛiwen n 30 sswayeɛ. Amek ara yili uberreḥ-agi amxalef?

• M’ara d-temlileḍ d walbeɛḍ tikkelt tamezwarut: Ssexdem aḥric aneggaru n treẓẓit-agi akken a d-tjebdeḍ ddehn n win ukud i teţmeslayeḍ, mbeɛd ɛreḍ aţ-ţebduḍ yid-es taɣuri n Wedlis Iqedsen. Tzemreḍ daɣen aţ-ţebduḍ taɣuri akk-d wid i k-d-iţţaken tameẓẓuɣt am yemdanen iɣef i trezzuḍ. Xas akken ar tura mazal ur bɣin ara ad ɣren Adlis iqedsen, ahat a sen-yeɛǧeb ţţawil-agi ajdid n uselmed i nessexdam tura. Ur ilaq ara a neǧǧ tareẓẓit-agi i wid ur nufa ara deg wexxam. Ur ţ-neţceggiɛ ara daɣen s tebṛaţ i lɣaci ur d-nefki ara tameẓẓuɣt. Tarbaɛt yesteklfen s leqdic di tejmaɛt tezmer aţ-ţheggi inejmuɛen i uberreḥ s zzyada di ccheṛ-agi amxalef.

• M’ara tiliḍ di liḥalat nniḍen: Ma tessexdam tejmaɛt-ik taceryult n tezmamin, err deg-s tareẓẓit Aţ-ţɛiceḍ i dayem! Ssefhem i win ara k-d-iḥessen, belli yezmer daɣen ad iɣer Adlis Iqedsen baṭel s treẓẓit-agi. Tzemreḍ aţ-ţebduḍ taɣuri yid-es imiren, neɣ efk-as ţţiɛad i wass nniḍen. Amḍebber n leqdic n uberreḥ yezmer ad yeḍleb i iberraḥen ijeṛṛben ad ṛuḥen ɣer imukan anda i llant tḥuna akk-d tkebbaniyin. Dinna, ad ḍelben ma yella win yebɣan ad iɣer Adlis Iqedsen. Tzemreḍ daɣen aţ-ţḍelbeḍ i wid ukud i txeddmeḍ ma bɣan ad ɣren Adlis Iqedsen yid-ek neɣ i wid ara d-temmagreḍ di liḥalat nniḍen xas ur tebniḍ ara a sen-tberrḥeḍ di tazwara.

Ɛisa ifka-yaɣ-d ccɣel a nɛiwen wiyaḍ ad uɣalen d ‘inelmaden’ w’a ‘ten-nesselmed’ (Mt 28:19, 20). Nessaram a nessiweḍ ɣer lmeqsud-agi s treẓẓit Aţ-ţɛiceḍ i dayem! deg uberreḥ-agi amxalef.