Amek i glaq a nḥemmel wiyaḍ
Akken ma nella nekka-d akk seg yiwen wemdan: Adam. Ihi, nekka-d akk seg yiwet n twacult. Lukan d lebɣi, iɛeggalen n twacult ad myeḥmalen w’ad ţţemqadaren. Meɛna, leḥmala-yagi qlilet di zzman-nneɣ. Acu kan, mačči d ayagi i geqsed Ṛebbi-nneɣ yeččuṛen d leḥmala.
ACU I D-QQARENT TIRA IQEDSEN ƔEF LEḤMALA
“Aţ-ţḥemmleḍ lɣir-ik am yiman-ik.”—AT LEWWI 19:18.
“Ḥemmlet iɛdawen-nwen.”—MATTA 5:44.
ACU I D LMEƐNA-S “AŢ-ŢḤEMMLEḌ LƔIR-IK”
Wali amek i d-iweṣṣef Ṛebbi leḥmala deg Wawal-is di 1 Ikurintiyen 13:4-7:
“Leḥmala, iwseɛ lxaṭer-is, leḥmala tesɛa lxiṛ.”
Xemmem ɣef wayagi: M’ara k-yeṣber walbeɛḍ, ixdem-ak lxiṛ, uyerna ur ireffu ara fell-ak m’ara tɣelṭeḍ, d acu ara tḥusseḍ?
“Leḥmala ur tḥeţţed ara.”
Xemmem ɣef wayagi: Ma iḥsed-ik walbeɛḍ, yeţţasem deg-k neɣ yeţcukku deg-k, d acu ara tḥusseḍ?
Leḥmala “ur teţnadi ara ɣef nnfeɛ-is.”
Xemmem ɣef wayagi: M’ara yeţqadar walbeɛḍ ayen i teţxemmimeḍ yerna ur yeţḥettim ara fell-ak ṛṛay-is, d acu ara tḥusseḍ?
Leḥmala “ur teţţaṭṭaf ara cceḥna.”
Xemmem ɣef wayagi: Ṛebbi yeţsamaḥ seg wul i wid i xedmen ayen n diri meɛna nedmen fell-as. “Ur iţeṭṭef ara cceḥna i dayem, zzɛaf-is ur iţdumu ara i lebda.” (Ahellil 103:9) Acḥal i nfeṛṛeḥ m’ara ɣ-isemmeḥ walbeɛḍ umi i nexdem kra! Nekni daɣen, yewwi-d ihi a neţsamaḥ i wiyaḍ, ma yella kra i ɣ-xedmen.—Ahellil 86:5.
Leḥmala “ur tfeṛṛeḥ ara s lbaṭel.”
Xemmem ɣef wayagi: Ma yeḍra-yaɣ-d kra n diri, a ɣ-iɣiḍ lḥal lukan ad feṛḥen wiyaḍ. Ihi, ur nfeṛṛeḥ ara s lexsaṛa ara d-yeɣlin ɣef wiyaḍ, xas ma yella nutni xedmen-aɣ ayen n diri.
Bac a ɣ-ibarek Ṛebbi, akka i glaq a nḥemmel wiyaḍ, akken bɣun ilin. Nezmer daɣen a d-neţbeggin leḥmala-yagi, m’ara neţɛawan lɣir-nneɣ.
