Seg wasmi i d-yeţwaxleq wemdan, Ṛebbi yeţmeslay akk-d lɛibad s lmuluk akk-d lanbeyya. Uyerna, yebɣa ad ţwaketben lexbaṛat i d-yefka akk-d lbaṛakat i gewɛed. Lewɛud-agi n Ṛebbi ɛnan tudert-ik ɣer zdat. Anda ihi i tzemreḍ aţ-ţafeḍ ass-a lewɛud-agi?

Neţţaf lexbaṛ i ɣ-d-iceggeɛ Ṛebbi di Tira Iqedsen. (2 Timutawus 3:16) Amek i gessexdem Ṛebbi lanbeyya akken ad ketben lexbaṛ-ines? Yerra ixemmimen-is deg uqerru n lanbeyya-yagi, i gketben mbeɛd lexbaṛ-ines. (2 Buṭrus 1:21) A d-nefk yiwen n lemtel: Ɣas ma yeḍleb wemɛellem i uxeddam-is ad yaru tabṛaţ, d amɛellem-agi i d bab n lexbaṛ yellan di tebṛaţ-nni. Kifkif ihi, ɣas ma yeḍleb Ṛebbi i kra n lanbeyya ad ketben Awal-is, d neţţa i d Bab n Tira Iqedsen.

Seg wakken yesɛa azal lexbaṛ yellan deg Wawal-is, Ṛebbi yebɣa mkul yiwen ad yessiweḍ a t-iɣer w’a t-yefhem. Ass-a, lexbaṛ-agi yessefṛaḥen yeţţunefk-ed “i mkul lǧens, i mkul lɛeṛc, i mkul tutlayt.” (Aweḥḥi 14:6) S lbaṛaka n Ṛebbi, Tira Iqedsen ţwaṭerjment, d iḥricen neɣ s lǧemla, deg wakteṛ n 3000 n lluɣat, yeɛni akteṛ akk ɣef tektabin nniḍen.