Tzemreḍ a d-txayleḍ tudert ɣef lqaɛa mebla tafat n yiṭij? Iṭij yeţţak tazmert i ttjuṛ iwakken a d-ssemɣint afriwen, ijeǧǧigen, lfakya akk-d zerriɛa. S yiṭij daɣen i tessent ttjuṛ; iẓuran-nsent ţsummun-d aman, ţţalin alamma d afriwen mbeɛd ţfuṛun di lhawa.

Ageffur (lehwa) ţ-ţukci ɛzizen sɣur Ṛebbi. Yis i d-teţţak lqaɛa ayen ara ččen lɛibad. Ṛebbi yeţţak-aɣ-d lefṣul akk-d ugeffur seg igenni iwakken ur ɣ-iţxaṣṣa wacemma w’ad yeččaṛ ulawen-nneɣ d lfeṛḥ.

Aṭas n ibabaten i getqelliqen axaṭer ur yeshil ara fell-asen a d-awin lmakla d llebsa i twaculin-nsen. Wali d acu i d-qqarent Tira Iqedsen *: “Muqlet s ifṛax n igenni: ur zerrɛen, ur meggren, ur jemmɛen deg yeɛricen; lameɛna Baba-twen n igenwan, iţɛeggic-iten. Ur ɛzizit ara akteṛ-nsen?”​—Matta 6:25, 26.

‘Muqlet amek igemmun sisan n lexla: ur ţɛeţţiben, ur ţellmen. A wen-d-iniɣ: ula d agellid Sliman, di ccan-is meṛṛa, ur ilsi am yiwen seg-sen. Ihi ma yella Ṛebbi yeslusuy akka leḥcic n lexla, [...], amek ur ixeddem ara akka i kenwi?’​—Matta 6:28-30.

Imi i gezmer Ṛebbi a ɣ-d-yefk lmakla d llebsa, yezmer daɣen a ɣ-iɛiwen a naf ayen akk i neḥwaǧ di temɛict-nneɣ. Ma neţnadi a nexdem lebɣi-s, yezmer ad ibarek lmeǧhudat-nneɣ ɣef lemtel m’ara nţeẓẓu, neɣ m’ara neţnadi axeddim bac a d-naɣ ayen i neḥwaǧ.​—Matta 6:32, 33.

M’ara neţmeyyiz ɣef yiṭij, ɣef ugeffur, ɣef yefṛax akk-d ijeǧǧigen, a d-naf belli aṭas n ssebbat i nesɛa ara ɣ-yawin a nḥemmel Ṛebbi. Deg weḥric ara d-itebɛen, a nefhem amek i geţmeslay Uxellaq-nneɣ akk-d yemdanen.