Kra ţnadin ad ẓren ma yeţţubeddel Wawal n Ṛebbi neɣ ala. Nnbi Icɛaya yenna-d belli Awal n Ṛebbi “ad idum i dayem.” (Icɛaya 40:8) Amek i nezmer a netḥeqqeq belli lewɛud n Ṛebbi mazal-iten ar ass-a, swaswa akken i ţwaketben di laṣel?

Di zzman aqdim, wid yeţneqqilen Tira Iqedsen seg uţafţar ɣer wayeḍ, ḥeţţben leḥṛuf meṛṛa yellan deg-s, iwakken ad tḥeqqen belli ulac d acu i d-rnan, neɣ d acu i beddlen neɣ d acu i ţţun. Meɛna imi imdanen ur kmilen ara, kra seg wigad-agi yeţneqqilen tira seg uţafţar ɣer wayeḍ xedmen kra n lɣelṭat timecṭaḥ. Acu kan, Ṛebbi, d Bab n Tezmert; yeţḥarab ɣef Wawal-is yerna yeţqerriɛ fell-as akken ur yeţţuḥerraf ara.

Luluf n iţafţaren n Tira Iqedsen n zik mazal-iten llan ar ass-a. Ma nufa di kra n uţafţar yiwet n lɣelṭa, xas ţ-ţamecṭuḥt maḍi, nezmer a nessenqed iţafţaren nniḍen iwakken a d-naf ayen yeţwaketben di laṣel. a

A d-nefk lemtel n iţafţaren n zik yeţţusemman Iţafţaren n lebḥeṛ Yemmuten. D imeksawen i ten-yufan di 1947, di kra n lɣiran yellan tama n lebḥeṛ Yemmuten. Iţafţaren-agi iqdimen ideg i llan yeḥricen n Tira Iqedsen, sɛan kteṛ n walfin iseggasen. Imusnawen n Tira Iqedsen nudan ad ẓren ma ɛedlen akk-d Tira Iqedsen yellan ass-agi. D acu i d-ufan?

Ufan-d belli ayen yellan deg Wawal n Ṛebbi i neqqar ass-agi yeɛdel swaswa d iţafţaren yellan di laṣel. b Ayagi d ţţbut belli Tira Iqedsen n wass-a, d Awal n Ṛebbi yellan di laṣel. Nezmer a neḍmen belli Ṛebbi iḥureb ɣef Wawal-is iwakken ad yeqqim iṣeḥḥa ar ass-a.

Nezmer ihi a nɣer Awal n Ṛebbi s ṭṭmana yerna neţţuqenneɛ belli iṣeḥḥa. Tura mi nefhem ayagi, a nwali d acu ara ɣ-sselmden lanbeyya ɣef Ṛebbi.