Ṛebbi yefka-d i lɛibad yiwet n tukci ack-iţ: taẓallit swayes i zemren ad hedṛen yid-es w’a s-inin ayen i ţḥussun. Nnbi Dawed yenna-d imeslayen-agi di tẓallit: “A win i d-isellen i tẓilla, imdanen meṛṛa ɣur-ek ara d-asen!” (Ahellil 65:3) Meɛna, amek i glaq aţ-ţeţẓallaḍ iwakken a k-d-iḥess Ṛebbi w’a k-ibarek?

Taẓallit ţ-ţaswiɛt ideg ara ‘d-tesmireḍ ul-ik zdat n Ṛebbi’, iwakken a s-tiniḍ swaswa d acu i teţḥussuḍ. (Ahellil 62:9) Bab n Tezmert iḥemmel m’ara s-neţẓalla seg wul.

Aṭas n imeslayen swayes i d-neţţader Ṛebbi (ɣef lemtel Anezmar, Axellaq neɣ Ssid), meɛna yiwen yisem kan i gesɛa. Ṛebbi s yiman-is yenna-d: “Nekk d Yahwa. D wagi i d isem-iw.” (Icɛaya 42:8, Traduction du monde nouveau, TMN) a Di Tira Iqedsen, isem-agi n “Yahwa” yeţwakteb azal n 7 000 n tikkal. Aṭas n lanbeyya, m’ara heddṛen d Ṛebbi, ssexdamen isem-is. Sidna Ibṛahim yenna: “Di leɛnaya-k a Yahwa, [...] eǧǧ-iyi ad hedṛeɣ [yid-ek].” (Laṣel n ddunit 18:30, TMN) Nekni daɣen, m’ara neţẓalla, ilaq a nessexdam isem n Ṛebbi, yeɛni Yahwa.

Ṛebbi ifehhem ixemmimen-nneɣ akk-d lḥisas-nneɣ akken tebɣu tili tutlayt (lluɣa) swayes i s-nheddeṛ. Iḍmen-aɣ deg Wawal-is belli “ur ixeddem ara maḥyaf ger yemdanen. D ṣṣeḥḥ, di mkul lǧens, win i t-iţţagwaden yerna iţeddu s lḥeqq, meqbul ɣur-es.”​—Lecɣal 10:34, 35.

Meɛna, iwakken a ɣ-ibarek Ṛebbi, mačči ţ-ţaẓallit kan i glaq a neţẓalla. Iḥricen ara d-itebɛen a ɣ-d-ssefhmen ayen i glaqen daɣen a t-nexdem.