Sidna Musa inna-d belli ma neţţaɣ awal i Ṛebbi, yeɛni ma neţḥessis i lumuṛ-is, Ṛebbi a ɣ-ibarek. (Asmekti 10:13; 11:27) Acu kan, ur s-neţţaɣ ara awal i Ṛebbi axaṭer neţţagad a ɣ-iɛaqeb. Neţţaɣ-as awal axaṭer nessen ṣṣifat-is, nḥemmel-it yerna ur nebɣi ara a t-nesseḥzen. Yura di Tira Iqedsen: “Ma nḥemmel Sidi Ṛebbi, ilaq a neḥrez [lumuṛ-is].”​—1 Yuḥenna 5:3, Awal n tudert, 2001.

Meɛna amek i ɣ-iţbarak Ṛebbi m’ara s-neţţaɣ awal? A nwali snat n lbaṛakat.

‘Nekk, Yahwa, Ṛebbi-inek, sselmadeɣ-k di nnfeɛ-ik, ţţawiɣ-k deg webrid ideg i glaq aţ-ţedduḍ.’​—ICƐAYA 48:17.

Yahwa Ṛebbi, yellan d Axellaq-nneɣ, yessen-aɣ yerna yeţţak-aɣ-d lewṣayat i ɣ-ilaqen. Ma nebɣa a ɣ-iɛiwen Ṛebbi akken a neţţaṭṭaf leqrarat n lɛali, ilaq a nnadi a nissin d acu i ɣ-d-yeṭṭalab di Tira Iqedsen w’a nessexdem ayagi di temɛict-nneɣ.

‘A sseɛd n wid isellen i wawal n Ṛebbi yerna ḥerrzen-t!’​—LUQA 11:28.

Ass-a, d imelyan n lɣaci i geţɛicin s ṣṣeḥ di lfeṛḥ axaṭer ţḥessisen i Wawal n Ṛebbi. A d-nehdeṛ ɣef yiwen wergaz izedɣen di tmurt n Sbenyul. Argaz-agi yezga izeɛɛef, cwiṭ kan akka, ad yeṭṭerḍeq. Yewɛeṛ mliḥ, uyerna ula ɣer tmeṭṭut-is. Yiwen wass, yeɣra di Tira n Sidna Musa taqsiṭ n nnbi Yusef, mmi-s n Yeɛqub. Di teqsiṭ-agi, iwala belli Yusef d argaz aḥnin. Yusef zzenzen-t ɣer tmurt tabeṛṛanit. Yuɣal dinna d akli yerna ssekcmen-t ɣer lḥebs di lbaṭel. Xas akken, yeqqim d aḥnin, yeţnadi dima ɣef lehna yerna yeţsamaḥ seg wul. (Laṣel n ddunit, ixfawen 37-45) Argaz-nni yenna-d: “Lemtel n Yusef iɛawen-iyi ad iḥnineɣ, ad iliɣ d win yelhan yerna ad ḥekmeɣ deg yiman-iw. Tura, feṛḥeɣ s ṣṣeḥ.”

Tira Iqedsen ţţakent-ed lewṣayat nniḍen ɣef wamek i glaq aţ-ţili tikli-nneɣ d wiyaḍ. A nwali ayagi deg weḥric ara d-itebɛen.