“Sumsing lamu na mungdan a sumsaw” ngu ai gaw shinggyim masha ni “Karai a Mungdan de shang lu na” matu hpaw ya ai ahkang aya hpe tsun ai re. (Mahte 16:19; Kasa 14:22) a Yesu gaw Petru hpe “sumsing lamu na mungdan a sumsaw ni” hpe jaw wa ai. Lachyum gaw, Karai Kasang a chyoi pra ai wenyi lu da ai, sadi dung ai masha ni gaw sumsing Mungdan de shang lu na ngu Petru tsun dan na ahkaw ahkang lu da ai re.

Sumsaw ni hpe kadai ni a matu lang ai kun?

 Petru gaw Karai Kasang kaw na ahkaw ahkang hte Karai a Mungdan de shang lu na masha hpung 3 hpe lam hpaw ya wa ai.

1.   Yuda hte Yuda hpung shang masha ni. Yesu si ai hpang kade n na yang, Karai Kasang gaw Yesu hpe Mungdan a hkawhkam hku nna lata da sai hpe Yuda hpung shang masha ni hkap la wa hkra, Petru shadut nna tsun wa ai. Hkye hkrang la hkrum na matu shanhte hpa galaw ra na lam hpe mung tsun wa ai. Dai hku nna, Mungdan de shang lu na lam hpe hpaw ya ai shaloi, hkying hku law ai masha ni gaw shi a ga hkap la wa ai.​—Kasa 2:38-41.

2.   Samari masha ni. Hpang hta, Petru hpe Samari masha ni hpang de sa dat ai. b Petru hte Yawhan gaw “dai masha ni chyoi pra ai Wenyi lu la na matu akyu hpyi ya” ai shaloi, sumsing lamu mungdan sumsaw hpe Petru lang wa ai. (Kasa 8:​14-​17) Dai hku nna, Samari masha ni mung mungdan de shang lu na ahkang lu wa ai.

3.   Maigan masha ni. Yesu si nna masum ning hte shata kru na ai hpang, Maigan masha ni (Yuda n re ai ni) mung Mungdan de shang lu na ngu Petru hpe Karai Kasang tsun wa ai. Dai majaw, Petru gaw maigan masha ni hpe hkaw tsun nna, shanhte mung chyoi pra ai wenyi lu la ai majaw Hkristan ni byin wa ai. Dai hku nna Mungdan de shang lu na chyinghka hpe Petru hpaw ya wa ai.​—Kasa 10:30-​35, 44, 45.

“Sumsing lamu na mungdan hta shang lu na” ngu ai gaw hpa lachyum kun?

 Shanhte gaw kaja wa nan “sumsing lamu na mungdan hta shang lu” nna sumsing lamu hta Yesu hte arau uphkang lu ai. Chyum Laika hta shanhte gaw “tingnyang hta dung” nna ‘hkawhkam hku nna ga ntsa e up nga’ na ngu myihtoi da ai.​—Luka 22:29, 30; Shingran 5:​9, 10.

Sumsing Mungdan a sumsaw hte seng nna chye na shut ai lam ni

 Chye na shut ai lam: Sumsing mungdan sumsaw hpe gara aten hta lang na ngu Petru dawdan na hpe sumsing lamu gaw la nga ai.

 Teng man lam: Yesu gaw sumsing Mungdan a sumsaw hte seng nna Petru hpe “ga hta nang gyit da mada gaw, sumsing lamu hta mung gyit da ai hkrum na ra ai; dinghta ga hta nang raw maraw gaw, sumsing lamu hta mung, raw kau ai hkrum na ra ai” ngu nna tsun wa ai. (Mahte 16:19) Ndai ga hpe nkau mi gaw Petru dawdan ai hpe sumsing lamu gaw madat ai ngu nna chye na ma ai. Raitim, madung Grik ga si ka hkrang hta gaw sumsing lamu dawdan da ai hpe she Petru hkan sa ra ai lam madun nga ai. c

 Petru Sumsing Lamu sumsaw hpe lang shagu sumsing lamu kaw na tsun ai hpe hkan sa ra ai lam Chyum Laika hta tsun dan da ai. Ga shadawn, Karai Kasang lam matsun ai hte maren masum lang ngu na sumsaw hpe shi lang wa ai.​—Kasa 10:19, 20.