Jahten hkrum na n re. Ginding aga gaw galoi mung jahten hkrum na n re ai zawn, wan nat kau hkrum na (sh) nnan bai byin wa na n re. Chyum Laika hta Karai Kasang gaw mungkan ga hpe htani htana agrin nga na matu hpan da sai ngu tsun da ai.

•   “Ding hpring ai ni gaw dai mungdan hpe madu lu nna, Dai hta e nan nawng e nga nga lu na ma ra ai.”​—Shakawn 37:29.

•   “Aga hpe de a npawt hta shi [Karai Kasang] gaw da nu ai, Dai gaw htani htana e shamu shamawt rai na n rai.”​—Shakawn 104:5.

•   “Ginding aga chyawm gaw, dinggrin a nga nga ai.”​—Hpaji 1:4.

•   “Sumsing lamu hpe hpan da ai Yehowa, ginding aga hpe hpajang tawn da ai hte shagrin da nhtawm, shanu nga na matu, akrin akraw n hpan da ai.”​—Esaia 45:18.

 Hka hte nbung awu asin re ai lam, majan (sh) kaga lama ma a majaw, mungkan ga htenza mat na hpe Karai Kasang ahkaw ahkang jaw na n re. De a malai, “lamu ga jahten shabyak kau ai ni hpe bai jahten shabyak kau na” re. (Shingran 11:18) Gara hku nna kun?

 Mungkan ga hpe n lu makawp maga ya ai masha asuya ni a shara hta, yawng mayawng hpe galaw ya lu ai hkum tsup ai sumsing lamu Mungdan hte galai bang kau ai hku nna re. (Daniela 2:​44; Mahte 6:​9, 10) Dai Mungdan hpe Karai Kasang a Kasha Yesu Hkristu uphkang mat na re. (Esaia 9:​6, 7) Yesu mungkan ga kaw nga wa ai aten hta, shing-ra tara hpe hkang lu ai lam galaw dan ai. (Marku 4:​35-​41) Karai Mungdan a Hkawhkam hku nna Yesu gaw, mungkan ga hte shing-ra tara ni hpe tsep kawp hkang mat na re. Mungkan ga hpe moi shawng de nga wa ai grai tsawm htap sai Edin sun zawn byin wa hkra nnan bai gram ya na re.​—Mahte 19:28; Luka 23:43.

 N re ai. 2 Petru 3:7 hta tsun da ai: “Ya e nga ai sumsing lamu ni hte ginding aga hpe chyawm gaw, tara n lang ai ni a daw dan ai hte jahten shabya hkrum na nhtoi du hkra, wan jahkru na” ngu ai ga hpe chye na shut chye ai. De a lachyum hpe chye na hkra karum ya ai ahkyak ai lam lahkawng hpe dinglik yu ga.

1.   Chyum Laika hta “sumsing lamu,” “ginding aga,” “wan” ngu ai ga si ni hpe kaga lachyum ni hte mung lang ai. Ga shadawn, Ningpawt Ninghpang 11:1 hta: “Ga ningtsa ting hta e n-gup ga langai sha hte tsun ai” ngu nna tsun da ai. Dai hta lawm ai “ga ningtsa” gaw masha ni hpe tsun ai re.

2.   2 Petru 3:7 hta tsun da ai shawng hpang ga yan ni gaw sumsing lamu, ginding aga, wan ni a lachyum hpe chye na hkra karum ya ai. Daw kaji 5 hte 6 kaw nga yang, Noa a prat hka sha-u ing ai lam tsun da ai. Dai aten hta, mungkan ga hpe hka hte jahten kau tim, mungkan ga gaw hkoi mat ai lam n nga ai. De a malai, nhkru ai shinggyim masha (sh) “dinghta ga” hpe gaw jahten kau ai. (Ningpawt 6:​11) Mungkan ga hpe uphkang nga ai masha asuya “sumsing lamu” hpe mung jahten kau ai. Nhkru n kaja ai shinggyim masha ni sha jahten hkrum ai. Mungkan ga chyawm gaw n jahten hkrum wa ai. Mungkan ga hpe hka sha-u ing ai hku nna jahten kau ai hpang, Noa hte shi a nta masha ni gaw mungkan ga ntsa hta sha matut nga wa ai.​—Ningpawt 8:​15-​18.

 Hka sha-u ing ai hka zawn, 2 Petru 3:7 hta tsun da ai “wan” mung mungkan ga hpe n re ai sha, nhkru ai masha ni hpe jahten na re. “Ding hpring rawng ai sumsing lamu nnan hte ginding aga nnan” byin wa na re ngu nna Karai Kasang ga sadi jaw da ai. (2 Petru 3:​13) “Ginding aga nnan” ngu ai shinggyim hpawng nnan hpe “sumsing lamu nnan” ngu ai Karai a Mungdan asuya nnan gaw uphkang mat na re. Dai Mungdan uphkang ai npu hta, mungkan ga gaw ngwi pyaw simsa ai Hparadisu byin wa na re.​—Shingran 21:​1-4.