Byin ra ai. Karai Kasang gaw, nawku daw jau lam hta masha ni hpe kahkyin gumdin shangun mayu ai. Chyum Laika hta ndai hku tsun da ai: “Tsaw ra ai myit rawng wa na hte kaja ai amu bungli byin wa na matu, . . . anhte gaw tinang a zup hpawng ai lam hpe n koi n kau ai sha, shada da hpe shadum shahprang nga ga.”—Hebre 10:24, 25.

 “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai” ngu Yesu tsun ai shaloi, sape ni gaw hpung langai hku nna nga nga na ngu shi tsun mayu ai re. (Yawhan 13:35) Hkristu a sape ni dai tsawra myit hpe madun lu ai madung lam gaw shada zuphpawng nna kanawn mazum ai lam re. Dai majaw, shanhte gaw nawku daw jau lam a matu ayan zuphpawng ai hpung ni hpe hpawng de da ma ai. (1 Korinhtu 16:19) Dai hpung ni yawng hpe pawng kau ai shaloi, mungkan grup hpunau nauna ni byin wa ai.—1 Petru 2:17.

Hpung shang masha langai byin ai hte sha n mai

 Masha ni gaw Karai Kasang hpe nawku daw jau na matu zuphpawng ging ai ngu Chyum Laika hta tsun da ai. Raitim, masha langai gaw hpung langai ngai a hpung shang masha byin ai hte sha, shi hpe Karai Kasang hkap la ai ngu Chyum Laika hta n sharin ya ai. Karai myit ra ai lam hpe lu na matu, uhpung sharin ya ai hte maren nga ra ai. Ga shadawn, Chyum Laika hta ndai hku tsun da ai: “Naw ku htung chyawm gaw, Ru tsang kyindut hkrum ai jahkrai nmai ni hte, gaida gaina ni hpe kawan katsan yu yu nna, mungkan ga a awu asin re ai hpe koi kau na gaw, Kawa Karai Kasang a man e san seng ai hte ra n rawng ai naw ku htung rai nga ai.”—Yaku 1:27.