Moi lai wa sai aten hta, Karai Kasang gaw la langai hpe num langai hta n-ga la na matu ahkang jaw wa ai. (Ningpawt 4:19; 16:1-4; 29:18-29) Raitim, num law law la ai htung lailen hpe Karai Kasang nnan gawde ya ai n re. Adam a matu madu jan hku nna num langai sha jaw wa ai.

 Num langai sha la ra ai ngu ai tsang madang hpe bai gawde na matu Karai Kasang gaw Yesu Hkristu hpe ahkang aya jaw wa ai. (Yawhan 8:28) Hkungran ai hte seng nna san wa ai shaloi, Yesu ndai hku tsun ai: “Shawng nnan e hpan da ai wa gaw, lasha yan numsha hpe hpan da mu ai rai nna, De a majaw lasha gaw shi a kanu yan kawa hpe kau da nhtawm, madu jan hte kanawn nna, shan lahkawng gaw hkum shan langai sha tai lu na ma ra ai.”​—Mahte 19:4, 5.

 Hpang e mung, Yesu a sape langai hpe ndai hku ka na matu Karai Kasang shung ya wa ai: “La langai hte langai tinang a num lu u ga, num langai hte langai tinang a la lu u ga.” (1 Korinhtu 7:2) Hkristan nawku hpung hta laksan ahkaw ahkang nga ai dinghku shang ngut sai la gaw “num langai sha lu ai wa” rai ra ai nga nna Chyum Laika hta tsun da ai.​—1 Timohti 3:2, 12.