Dai ni aten hta byin nga ai shing-ra tara tsin-yam ni gaw Karai Kaang galaw ai n re. Raitim, de a majaw hkra machyi ai masha ni hpe gaw shi lanu lahku ya ai. Tsin-yam tsindam byin shangun ai shing-ra tara ni hpe kade n-na yang, Karai a Mungdan gaw hkang mat na re. Ya aten hta gaw, shing-ra tara a majaw byin ai tsin-yam tsindam hkrum nga ai ni hpe Karai Kasang shalan shabran ya nga ai.​—2 Korinhtu 1:3.

•  Shing-ra tara tsin-yam ni gaw Karai Kasang ari jaw ai n re ai hpe hpa majaw lu tsun ai kun?

•  Shing-ra tara tsin-yam gaw jahtum nhtoi a namik kumla kun?

•  Shing-ra tara tsin-yam hkrum nga ai ni hpe Karai Kasang gara hku karum ya ai kun?

•  Shing-ra tara tsin-yam hkrum wa yang na matu tau hkrau lajang da lu hkra Chyum Laika gaw karum ya lu ai kun?

•  Shing-ra tara tsin-yam hkrum ai ni a matu shalan shabran ya ai Chyum daw ni

 Chyum Laika hta lawm ai shing-ra tara n-gun atsam hpe Karai Kasang akyu jashawn ai lam hte shing-ra tara tsin-yam byin ai lam gaw n bung ai.

•   Shing-ra tara tsin-yam ni gaw hkrup mara yawng hpe jahten shaza shangun ai. Raitim, shing-ra tara n-gun atsam hpe akyu jashawn nna Karai Kasang tara jeyang ai shaloi gaw nhkru ai masha ni sha jahten hkrum nna si ra ai. Ga shadawn, moi na Sodom hte Gomora mare hpe Karai Kasang jahten ai shaloi, dingman ai Lawt hte shi a kasha num kasha lahkawng a asak hpe hkye la wa ai. (Ningpawt 19:29, 30) Dai aten hta, Yehowa gaw masha ni a myit masin hpe yu nna, nhkru n kaja ai masha ni hpe sha jahten wa ai.​—Ningpawt 18:23-​32; 1 Samuela 16:7.

•   Shing-ra tara tsin-yam ni gaw law malawng hku nna tau hkrau n chye ai sha byin wa ai. Raitim, Karai Kasang gaw shing-ra tara n-gun atsam hpe akyu jashawn nna n jahten shi yang, nhkru ai masha ni hpe tau hkrau sadi jaw ai. Sadi jaw ga hpe hkap la ai ni gaw, tsin-yam tsindam kaw na lawt lu ma ai.​—Ningpawt 7:​1-5; Mahte 24:38, 39.

•   Shinggyim masha ni gaw shing-ra tara tsin-yam nkau mi hte kaga sawng ai lam ni hpe byin shangun ai. Gara hku nna kun? Shing-ra tara hpe jahten shaza ai hku nna re. Nnang nawn byin chye ai ginwang, hka kaba chye ai shara, lamu marang ladu lai sawng ai shara ni hta nga ai majaw mung, tsin-yam hkrum chye ai. (Shingran 11:18) Shinggyim masha ni a shut shai ai dawdan lam a majaw Karai Kasang hpe mara n mai shagun ai.​—Ga Shagawp 19:3.

 Re ai. “Mungkan ga a htum wa na” shing nrai “hpang jahtum na nhtoi” hta tsin-yam tsindam ni byin na nga nna Chyum Laika hta tau hkrau myihtoi htoi da ai. (Mahte 24:3; 2 Timohti 3:1) Ga shadawn, anhte asak hkrung ai aten ladaw hte seng nna Yesu ndai hku tsun ai: “Hku hku ai hte nnang nawn, shara kaga kaga hta e byin wa na ra ai.” (Mahte 24:7) Kade n na yang, shing-ra tara tsin-yam ni hte machyi makaw, yakhkak jamjau ai lam ni byin shangun ai lam yawng hpe Karai Kasang gaw yen seng kau ya sana re.​​—Shingran 21:​3, 4.

•   Shing-ra tara tsin-yam hkrum ai ni hpe shi a Mungga re ai Chyum Laika hte shalan shabran ya ai. Karai Kasang gaw anhte hpe yu lanu lahku ya ai hte anhte yakhkak tsin-yam hkrum yang, hkamsha ai ngu nna Chyum Laika hta tsun da ai. (Esaia 63:9; 1 Petru 5:​6, 7) Shing-ra tara tsin-yam n nga mat sana aten a lam Chyum Laika hta Karai Kasang ga sadi jaw da ai.​—“ Shing-ra tara tsin-yam hkrum ai ni a matu shalan shabran ya ai Chyum daw ni” ngu ai hpe mung yu u.

•   Shing-ra tara tsin-yam hkrum ai ni hpe makam masham bung ai hpunau nauna ni hku nna karum ya ai. Yesu a kasi ningli hpe hkan sa ai Hkristan hpunau nauna ni hpe Karai Kasang akyu jashawn ai. “Gawng run ai ni” hte “yawn hkyen hkrum ai ni” hpe Yesu shalan shabran ya na ngu nna Chyum Laika hta myihtoi htoi da ai. (Esaia 61:​1, 2) Karai Kasang hpe nawku daw jau nga ai ni mung dai hte maren galaw ya nga ai.​—Yawhan 13:15.

   Shing-ra tara tsin-yam hkrum ai ni hpe tatut karum ya na matu mung, hpunau nauna ni hpe Karai Kasang akyu jashawn ai.​—Kasa 11:28-30; Galati 6:​10.

 Karum ya lu ai. Chyum Laika gaw shing-ra tara tsin-yam a matu tau hkrau hkyen lajang lu hkra karum ya ai ladat laika buk gaw n raitim, karum madi shadaw ya ai npawt tara ni lawm ai. Ga shadawn:

•   Byin wa chye ai shing-ra tara tsin-yam ni a matu tau hkrau lajang da u. “Hpaji rawng ai wa gaw, n kaja ai hpe tau chye nna, koi kau nga ai” ngu nna tsun da ai. (Ga Shagawp 22:3) Shing-ra tara tsin-yam garai n byin shi yang kaw na tau hkrau hkyen lajang da mai ai. Tsin-yam du wa ai shaloi, kalang ta la mat mai ai ahkyak ai tsi sutdek kasha hpe hkyen lajang ai, tsin-yam hkrum ai shaloi nta masha ni gara kaw hkrum zup na ngu ai shara hpe masat da ai hku nna re.

•   Sutgan ni hta na asak hpe manu shadan u. Chyum Laika hta ndai hku tsun da ai: “Ndai mungkan ga de hpa n lawm ai sha, anhte shang wa ga ai rai nna, dai hta na pru wa yang mung, hpa n la wa lu ga ai.” (1 Timohti 6:​7, 8) Tsin-yam kaw na lawt lu na matu, tinang madu ai sutgan arung arai ni hpe tawn kau nna sharawng awng let nta kaw na pru wa mayu ai myit nga ra ai. Asak gaw sutgan arung arai ni hta grau ahkyak ai hpe myit hta bang da ging ai.​—Mahte 6:​25.