“Sumsing Lamu” ngu ai ga si hpe Chyum Laika hta lam 3 hku nna tsun da ai: (1) teng sha re ai sumsing lamu; (2) wenyi hkum ni nga ai sumsing lamu; (3) tsaw ai shing nrai shagrau hkrum ai masa hte mung ga shadawn tsun ai lam ni re. Lam langai hpra hta, shawng hpang ga yan ni hta madung nna jaw ai lachyum ni hpe ginhka chye lu ai. a

1.   Teng sha re ai sumsing lamu. Ndai hta “sumsing lamu” ngu ai gaw ginding ga a nbung shing (earth’s atmosphere) hpe tsun mayu ai re. Nbung ni chyam bra nna bung nga ai shara, ntsa malen na u ni pyen chyai ai shara, marang hte hkyen ni byin hpang ai shara hte myihprap galam ai shara re. (Shakawn 78:26; Ga Shagawp 30:19; Esaia 55:10; Luka 17:24) Lamu hpungtang a shinggan hta na “jan, shata, shagan ni” nga ai shara hpe mung tsun ai re.—Tara Jahprang 4:19; Ningpawt 1:1.

2.   Wenyi hkum ni nga ai shara. Shinggyim masha ni hta madang grau tsaw nna, ninggawn tawa a shinggan hta nga ai wenyi hkum ni nga ai shara hpe tsun ai shaloi mung “sumsing lamu” ngu ai ga si hpe lang ai. (1 Hkawhkam 8:27; Yawhan 6:38) “Wenyi” hkum re ai Yehowa Karai Kasang hte shi hpan da ai lamu kasa ni mung dai shara hta nga ai. (Yawhan 4:24; Mahte 24:36) Kalang lang, “Chyoi pra ai ni a hpung” ngu nna, sadi dung ai lamu kasa ni hpe shadawn tsun ai shaloi mung, “sumsing lamu” ngu ai ga si hpe lang ai.—Shakawn 89:5-7.

    Yehowa Karai Kasang nan shi nga ai shara hpe tup hkrak tsun dan ai shaloi mung “sumsing lamu” ngu nna Chyum Laika hta lang da ai. (1 Hkawhkam 8:43, 49; Hebre 9:24; Shingran 13:6) Ga shadawn, Satan hte Nat ni gaw sumsing lamu kaw nna, gawt shapraw kau hkrum ai hpang, Yehowa a man hta shang wa lu na ahkang n lu sana lam hpe Chyum Laika hta myihtoi da ai. Raitim, shanhte gaw wenyi hkum ni naw rai nga ai.—Shingran 12:7-9, 12.

3.   Tsaw ai shing nrai shagrau hkrum ai masa hte mung ga shadawn tsun ai. Chyum Laika hta tsaw ai shara hpe ga shadawn hku tsun ai shaloi “sumsing lamu” ngu ai ga si hpe lang ai, laksan hku nna gaw uphkang ai ahkaw ahkang hte seng nna tsun ai shaloi re. Dai zawn ahkang aya hpe lu ai gaw:

   •   Chyahtum Chyalai N-gun Atsam Rawng Ai Yehowa Karai Kasang nan re ai.—2 Hkawhkam Labau 32:20; Luka 15:21.

   •   Masha uphkang ai lam hta malai shang na Karai Kasang a Mungdan asuya re. Dai Mungdan hpe Chyum Laika hta “sumsing lamu ningnan” ngu tsun da ai.—Esaia 65:17; 66:22; 2 Petru 3:13. b

   •   Ginding ga hta nga nga ai raitim, sumsing lamu de lung na matu myit mada lam nga ai Hkristan ni re ai.—Ehpesu 2:6.

   •   Npu taw nga ai masha ni hpe, up sha nga ai shinggyim asuya ni re ai.—Esaia 14:12-14; Daniela 4:20-22; 2 Petru 3:7.

   •   Ya aten hta, ndai mungkan hpe uphkang nga ai nhkru ai nat ni re.—Ehpesu 6:12; 1 Yawhan 5:19.

Sumsing lamu gaw hpa hte bung ai kun?

 Wenyi hkum ni nga ai sumsing lamu gaw, galaw ra ai amu bungli ni hte hpring nga ai shara langai re. “[Yehowa] a mungga hpe shadik ya” nga ai wan hkying hku law htam ai wenyi hkum ni gaw, dai shara kaw nga ma ai.—Shakawn 103:20, 21; Daniela 7:10.

 Sumsing lamu gaw grai htoi kabrim nga ai ngu Chyum Laika hta tsun da ai. (1 Timohti 6:15, 16) Myihtoi Ezekela gaw “htoi kabrim ai” sumsing lamu shingran langai hpe lu wa ai. Daniela gaw “wan grung ai hka hpawk” ni lawm ai sumsing lamu shingran langai hpe mu wa ai. (Ezekela 1:26-28; Daniela 7:9, 10) Sumsing lamu gaw san seng ai, chyoi pra ai hte grai tsawm ai shara re.—Shakawn 96:6; Esaia 63:15; Shingran 4:2, 3.

 Sumsing lamu hte seng nna, Chyum Laika hta tsun da ai hpe yu yang, myit kahpra ai hte mauhpa lam ni hpring nga ai shara re ai hpe chye lu ai. (Ezekela 43:2, 3) Raitim, shinggyim masha ni hku nna, sumsing lamu a lam yawng hpe mahkra chyena na matu gaw n mai byin ai. Wenyi hkum ni nga ai shara gaw, anhte a nyan hte n dang dep ai lam ni rai nga ai majaw re.