•  Nang chye da ging ai lam

•  Nang galaw lu ai lam

•  Ramma shada tsun ai lam

• Manang shada da hta manghkang nga chye ai. N hkum tsup ai masha ni re ai majaw, na a manang kaja ni, kaja htum manang re ngu shadu da ai manang pyi, nang hpe hkra machyi shangun ai ga ni tsun chye, galaw chye ai. Nang mung n hkum tsup ai masha re. Na a majaw marai langai ngai hkra machyi mat ai aten hpe naw dum ai kun?​—Yaku 3:2.

• Internet a majaw mung, hkra machyi shangun chye ai. Ga shadawn, Dewit ngu ai ramma langai ndai hku tsun ai: “Nang internet yu nga ai shaloi, kanawn mazum lam galaw nga ai manang ni a sumla hpe mu dat ai. Dai shaloi nang hpe gaw n shaga ai ngu hkam sha wa nna, myit n pyaw byin wa na re.”

• Manghkang hpe nang hparan lu ai.

Na hkum nang jep yu u. Chyum Laika hta “pawt sindawng hkra myit hkum gadun et; kaning rai nme law, pawt sindawng ai gaw angawk ai wa a kraw hta e de nga ai” ngu tsun da ai.​—Hpaji 7:9.

“Hpa n re ai lam hte sha nang myit n pyaw byin nga ai hpe, hpang de bai chye wa na ra ai.”​—Alisa.

Myit yu na lam: Nang gaw hkra machyi loi ai wa byin nga ai kun? Kaga ni a n hkum tsup ai lam hpe grau nna hkam mana chye na matu nang sharin la mai na kun?​—Hpaji 7:21, 22.

Mara raw ya ai a akyu ni hpe myit yu u. Chyum Laika hta “masha wa shut ai hpe, hkam mana ai gaw, shi a arawng rai nga ai” ngu tsun da ai.​—Ga Shagawp 19:11.

“Nang hpe hkra machyi shangun ai lam ni nga tim pyi, tsep kawp mara raw kau ya ai gaw kaja ai. Tsun mayu ai gaw, nang myit n gut nga ai lam hpe jahkring hkring bai shadum nna, nang hpe shi hpyi nem wa hkra hkum galaw. Kalang mara raw kau ya sai nga yang, dai lam hpe bai hkum tsun.”​—Melori.

Myit yu na lam: Ndai masa gaw teng sha ahkyak ai lam re ai kun? Simsa lam lu na matu nang mara raw kau ya lu na kun?​—Kolose 3:13.

Kaga ni a matu myit ya u. Chyum Laika hta “langai hte langai tinang hte seng ai sha n rai, masha gale hte seng ai hpe mung, myit yu nga mu ga” ngu tsun da ai.​—Hpilipi 2:4.

“Manang shada tsawra myit hte hkungga ai lam nga yang, manghkang ni hpe nang lawan hparan mayu na re. Hpa majaw nga yang, dai zawn manang byin na matu nang grai sak jaw tawn da sai. Manang byin wa na matu nang grai shakut da sai majaw, dai hpe sum kau mayu na n re.”​—Niko.

Myit yu na lam: Kaga ni a ningmu hku nna akyu nga ai lam nkau hpe nang tam lu na kun?​—Hpilipi 2:3.

Madung lam: Myit hkra machyi loi ai hpe gara hku hparan lu na lam chye da ai gaw nang kaba wa yang na matu mung grai kaja ai. Dai majaw, ya kaw nna dai atsam nga hkra sharin la ra ai.