April 11, Bat Lahkawng Ya shani galaw na Myit Dum Poi hta, wenyi lam hta katsi mat ai Hkristan ni mung sa lung na re. Nkau mi gaw Yehowa Hpang De Bai Wa Rit ngu ai brochure hta tsun da ai hte maren, asak gat shingjawng poi hta shang lawm wa ai raitim, lam amyu myu a majaw n-gun yawm mat ai ni re. (Heb. 12:1) Wenyi lam hta katsi mat ai ni hpe Yehowa gaw, shi kasha a asai hte mari da ai majaw shanhte gaw grai manu dan ai hpe dum u. (Kasa 20:28; 1 Pet. 1:18, 19) Shanhte nawku hpung de bai wa hkra anhte gara hku karum ya na kun?

Sagu hpung kaw nna mat mat ai sagu hpe shakut nna tam ai sagu rem wa zawn, nawku hpung a myitsu salang ni mung wenyi lam hta katsi mat ai Hkristan ni hpe tam nna karum ya ai. (Luka 15:4-7) Dai hku galaw ai gaw, Yehowa a tsawra myit hpe kasi la ai re. (Yer. 23:3, 4) Myitsu salang ni hta n-ga, anhte yawng mung shanhte hpe n-gun jaw mai ai. Dai hku tsawra myit hte matsan dum ai lam madun yang, Yehowa shaman chyeju jaw na re. (Ga Sha. 19:17; Kasa 20:35) Dai majaw, kadai hpe n-gun jaw ra na hpe myit nna kalang ta galaw u.

Wenyi Lam Hta Katsi Mat Ai Ni Hpe N-Gun Jaw U Video Hpe Yu Ngut Ai Hpang, Lawu Na Ga San Ni Hpe Maram Yu U:

• Nauna Abi gaw wenyi lam hta katsi mat ai Sakse langai hte hkrum ai shaloi gara hku galaw wa ai kun?

• Wenyi lam hta katsi mat ai langai ngai hpe karum ya na matu, myitsu salang ni hpe hpa majaw san ra na kun?

• Abi gaw Lawra hpang de bai sa kawan na matu gara hku shajin wa ai kun?

• Lawra hpe tsawra myit hte n-gun jaw ai shaloi, Abi gaw myit n daw ai sha myit galu ai lam gara hku madun wa ai kun?

• Luka 15:8-10 hta lawm ai Yesu a ga shadawn gaw, anhte hpe hpa sharin ya ai kun?

• Lawra hpe jawm shakut nna karum ya majaw, hpa shaman chyeju ni lu wa ai kun?