Sumla n mai nawku ai hte seng ai tara n nga shi ai aten kaw nna pyi, Yehowa hpe sha nawku ra ai lam Yaku chye wa ai. (Pru 20:3-5) Dai majaw, Yehowa gaw shi hpe Behtela de bai nhtang wa na matu tsun ngut ai hpang, Yaku gaw shi hte lawm wa ai masha ni yawng hpe, shanhte a hpara sumla ni kabai kau na matu lam matsun wa ai. Lakhpoi zawn re ai na kai (sh) na dan ni hte hpawn, hpara sumla ni hpe mung kabai kau ai. (Nin 35:1-4) Yehowa gaw, Yaku galaw wa ai hpe ra sharawng na gaw teng sha re.

Dai ni aten hta, Yehowa hpe sha nawku ai lam gara hku madun lu ai kun? Hpara sumla (sh) nat hpaji hte matut mahkai ai lam yawng hpe, koi gam ai hku nna galaw hpang mai ai. Dai hta, nat hpaji hte seng ai arung arai yawng hpe kabai kau ai, shangwi shapyaw lam ni hpe atsawm myit nna lata ai lam ni lawm ai. Ga shadawn, tinang hkum tinang san u: ‘Hpuk shang ai wa, sai chyup hpuk (sh) shingra tara hta jan ai lam ni lawm ai sumla hkrung ni, laika buk ni hpe ngai ra sharawng nga ai kun? Ngai yu ai ni hta mandan hpaji, ahkyu hkyu sha ai, dagam dala ga ni hpe shoihpa n nga ai mani hpa zawn, tsun dan nga ai kun?’ Anhte ni gaw Yehowa n ju n dawng ai lam yawng hte tsan tsan nga ging ai.​—Shk 97:10.

“NAT GUMLAU HPE BAN HKUM KAU MU” VIDEO HPE YU NNA LAWU NA GA SAN NI HPE HTAI U:

• Chyum ga sharin Palesa a prat hta gara manghkang ni hkrum wa ai kun?

• Nat hte seng ai manghkang ni hkrum wa yang, myitsu salang ni kaw karum hpyi ai gaw hpa majaw hpaji rawng ai kun?

• Yehowa makawp maga ya ai hpe lu mayu yang, hpa ni hpe anhte tsep kawp kabai kau ra ai kun?

• Palesa gaw hpa galaw na matu alawan dawdan wa ai kun?

• Nang nga ai shara hta, nat ni a shingkang ka-up chye ai gara lam ni hpe koi lu na kun?