Shapraw ai lam gaw nawku hpung hpe makawp maga ai rai nna, mara galaw nna myit malai n lu ai wa hpe sharin shaga ai re. (1Ko 5:6, 11) Ndai zawn Yehowa sharin shaga ai lam hpe hkan sa ai gaw tsawra ai lam madun ai re. Shapraw ai lam galaw ai shaloi, tara komiti hta lawm ai ni, grai hkau ai manaw manang ni hte jinghku jingyu ni yawng gaw myit n pyaw ai. Rai yang dai gaw gara hku nna tsawra myit madun ai rai na kun?

Dai hta n-ga, Yehowa a mying ningsang hte shi a chyoi pra ai tsang madang hpe tsawra ai lam madun ai re. (1Pe 1:14-16) Shapraw hkrum ai wa hpe tsawra ai lam madun ai mung re. Laja lana sharin shaga ai gaw, grai hkamsha shangun tim, “ding hpring ngu ai ngwi pyaw ai asi si shapraw ya” ai. (Heb 12:5, 6, 11) Shapraw da hkrum ai ni, tinang hkrai kanawn mazum lam jahkring kau ai ni hpe kanawn mazum ai gaw, Yehowa sharin shaga ai hpe ninghkap nga ai re. Yehowa gaw shi a amyu masha ni hpe “ram ram sharin” shaga ai hpe dum u. (Yer 30:11) Yehowa sharin shaga ai hpe madi shadaw ya nna, tinang a wenyi arawn alai ni hpe matut hkang da yang, shapraw hkrum ai wa gaw matsan dum myit nga ai Kawa hpang de bai nhtang wa na hpe myit mada mai ai.—Esa 1:16-18; 55:7.

MYIT MASIN MAHKRA HTE MATUT SADI DUNG U VIDEO HPE YU NNA, LAWU NA GA SAN NI HPE HTAI U:

• Ma langai Yehowa hpe kau da ai shaloi Hkristan kanu kawa ni gara hku hkamsha ai kun?

• Sadi dung ai nta masha ni hpe nawku hpung gaw gara hku madi shadaw lu ai kun?

• Nta masha hpe sadi dung ai htan Yehowa hpe sadi dung ai gaw grau ahkyak ai lam gara Chyum Laika ga shadawn gaw madun ai kun?

• Yehowa hte nta masha ni hpe gara hku sadi dung mai ai kun?