Chyum Laika hta, Satan gaw anhte hpe zingri zingrat nna, hkaw tsun bungli hpe pat shingdang da na lam myihtoi da ai. (Yaw. 15:20; Shi. 12:17) Kaga mungdan hta zingri zingrat hkrum nga ai Hkristan ni a matu anhte gara hku karum ya lu na kun? Shanhte a matu akyu hpyi ya mai ai. “Ding hpring ai wa a hpyi nem ai ga gaw, shabyin lu na atsam law law rawng nga lu ai.”​—⁠Yak. 5:⁠17.

Gara lam ni hpyi ya mai na kun? Hpunau nauna ni hpe n-gun jaw na matu hte hkrit ai myit n rawng hkra karum ya na matu, Yehowa kaw akyu hpyi mai ai. (Esa. 41:​10-13) Ahkang aya lu ai ni hkaw tsun bungli hpe n pat shing dang ai sha, galaw shangun na matu akyu hpyi mai ai. Rai yang, “anhte ngwi pyaw ai hte sumnung shingdi” let galaw lu na re.​—⁠1 Tim. 2:​1, 2.

Pawlu hte Petru zingri hkrum nga ai shaloi, tsa ban langai na Hkristan ni gaw shanhte a matu amying hte nawng, akyu hpyi ya wa ai. (Kasa 12:5; Rom. 15:​30, 31) Dai ni aten hta zingri hkrum nga ai ni a mying yawng hpe n chye tim, shanhte a nawku hpung, mungdan (sh) buga ni hpe shalawm nna akyu hpyi ya mai na kun?