Yesu a aten hta Galile hta nang asak hkrung nga ai ngu shingran yu u. Nang gaw Sum Poi a matu, Yerusalem de bu hkawm nga ai. Dai mare hta sumtsan kaw na, Yehowa hpe nawku ai ni law law mung du nga ai. Nang gaw, Yehowa hpe hkungga nawng mayu ai. Dai majaw, bainam hpe dun let nawku htingnu de sa mat ai. Nang du ai shaloi, kaga masha ni mung shagu hkungga nawng na matu du nga ai. Hpang jahtum, na a bainam hpe hkungga nawng na matu, hkinjawng wa hpe ap na aten du sai. Dai aten hta, nang hte n htuk hkat ai hpunau hpe kalang ta dum dat ai. Shi gaw ndai masha hpawng (sh) ndai mare hta nga ai mung mai byin ai. Yesu gaw nang hpa galaw ging ai hpe tsun dan ai. (Mahte 5:24 hpe hti u.) Yesu tsun ai hte maren, nang hte n htuk hkat ai hpunau wa hte bai simsa hkra gara hku galaw na kun? Lawu na lam ni hta na, jaw ai mahtai hpe mahkret u.

Nang Galaw Ra . . .

• dai zawn myit n pyaw hpa lam hpe, shi sha galaw ai ngu myit nna hpunau wa hpe sa tsun na

• hpunau wa gaw tsun n hkam ai, manghkang byin ai gaw shi a majaw mung re ngu tsun na matu sa na

• na a hpunau wa sang lang dan ai hpe myit galu let madat ya nna, atsawm n chye na yang pyi, tinang a arawn alai a majaw, n myit mada ai sha hpunau wa hpe myit n pyaw byin shangun ai hpe hpyi nem tawngban na

Na A Hpunau Galaw Ra . . .

• nawku hpung kaw na kaga masha ni hpe, shi galaw shut ai lam ni hpe tsun dan na

• shi hpe pawt let, mara ni hpe madi madun nna, shi shut ai hpe yin la shangun na

• shagrit shanem let n-gun da ting nna, tinang hpang de sa wa ai hpunau hpe, myit masin mahkra hte mara raw ya na

Dai ni aten hta, dusat hkungga n nawng ra mat sai. Raitim, Yesu a sharin ga hta anhte a hpunau hte simsa hkra galaw ai hte Karai Kasang hkap la ai nawku dawjau lam gaw, gara hku matut manoi nga ai kun?