Ladu hkrum ginwang zuphpawng hta anhte hpa majaw grai kabu pyaw ai kun? Moi na Israela ni zawn sha, dai ni aten na ginwang zuphpawng ni mung, tsa lam hku, hkying lam hku law ai hpunau nauna ni hte arau Yehowa hpe nawku daw jau na ahkang lu shangun ai. Grai law ai wenyi lusha ni hpe anhte lu la ai majaw kabu ga ai. Dai sha n-ga, manang ni, nta masha ni hte mung manu dan ai aten hpe jahtum lu ai. Dai majaw anhte gaw 3 ya na ai zuphpawng kaba hpe lung mayu ai.

Anhte shada da kanawn mazum ai shaloi, langai hpra hpa akyu lu ai lam sha n-ga, kaga ni hpe gara hku tsawra myit madun lu ai lam hpe mung myit ging ai. (Gal 6:10; Heb 10:24, 25) Shara la ai shaloi anhte a kahpu kanau ni hte tinang a matu hpe sha la ai hku nna, kaga masha ni a matu myit ya ai lam madun mai ai. (Hpl 2:3, 4) Ginwang zuphpawng ni gaw manang nnan ni lu na matu anhte hpe ahkaw ahkang lu shangun ai. Zuphpawng n hpang shi ai aten hte ngut ai hpang, shani shat sha hkring ai aten ni hta laksan hku nna, anhte n chye ai ni hte ga shaga na matu shakut mai ai. (2Ko 6:13) Ndai zawn aten hta jinghku hku la ai gaw prat tup a matu re. Dai hta n-ga, anhte madun ai tsawra myit hpe mu ai ni mung, anhte hte rau Yehowa hpe nawku daw jau na matu dawdan wa na re.​—Yhn 13:35.

TSAWRA MYIT GAW AGRIN NGA AI MUNGDAN GA DAGA ZUPHPAWNG VIDEO HPE YU NNA, NDAI GA SAN NI HPE HTAI U:

• 2019 mungdan ga daga zuphpawng sa lung ai manam ni hpe gara hku tsawra myit madun wa ai kun?

• Yehowa a masha ni hta nga ai tsawra myit hte kahkyin gumdin lam gaw hpa majaw grai laklai ai kun?

• Uphkang hpung shang hpunau ni gaw Hkristan ni a gara tsawra myit hpe madung tsun wa ai kun?

• Hkristan tsawra myit gaw Jamani hte Dingda Korea hta nga ai hpunau ni hpe gara hku awng dang shangun ai kun?

• Anhte hpa galaw na matu dawdan da ging ai kun?