Nang shani shagu hkrum ai mayak mahkak gaw hpa rai kun? Dinghku ningbaw re ai majaw galaw ra ai lit grai law ai kun? Nang gaw ningrum ningtau n nga ai sha dinghku hpe bau maka taw ai wa kun? Nang gaw ramma shada a dang sha ai hpe hkrum nga ai wa kun? Asak kaba nna hkam n kaja ai wa kun? Masha shagu hta manghkang nga ai. Hkristan law law gaw, manghkang law law hpe kalang ta hkrum wa chye ai. Raitim, kade n na yang dai zawn manghkang ni kaw na lawt lu sana lam anhte chye da ai.​—2Ko 4:16-18.

Yehowa gaw anhte a manghkang ni hpe chye ai, sadi dung ai lam hte hkamjan nga ai lam ni hpe manu shadan ya ai, shi anhte hpe shaman chyeju jaw na hpe chye da ai majaw shalan shabran lam lu ai. (Yer 29:11, 12) Yesu mung anhte langai hpra hpe myit lawm ai. Hkristan lit ni hpe anhte atsawm galaw na nga yang, “ngai nanhte hte rau dinggrin a nga nga na” ngu Yesu ga sadi jaw da ai. (Mat 28:20) Karai Mungdan npu hta lu la na htawm hpang a lawt lu lam ni hpe aten la nna myit sumru jang, ya aten hta hkrum ai mayak mahkak ni hpe hkamjan lu nna, anhte a myit mada lam ngang kang na re.​—Rom 8:19-21.

NBUNG LARU RU TEN NI WA AI HTE MAREN YESU HPE MATUT NNA MYIT MAJU JUNG NGA U​—MUNGDAN A HTAWM HPANG SHAMAN CHYEJU VIDEO HPE YU NNA, LAWU NA GA SAN NI HPE HTAI U:

• Shinggyim masha ni gaw Karai Kasang hte gara hku tsan mat wa ai kun? Hpa byin wa ai kun?

• Yehowa hpe sadi dung ai ni a matu gara htawm hpang prat la nga ai kun?

• Dai zawn kaja ai htawm hpang prat gaw gara hku byin mai na kun?

• Mungkan nnan hta lu la na gara shaman chyeju ni hpe nang myit mada ai kun?