Wenyi bandung ni jahkrat nna, anhte a n-gun atsam hpe hpaji rawng ai hku akyu jashawn ai. (1Ko 9:26) Bandung ni gaw ndai nhkru ai mungkan a jahtum n du shi yang, ngam nga ai aten hpe hpaji rawng ai hku lang na matu karum ya ai. (Ehp 5:15, 16) Dinghku nawku galaw ai shaloi, du wa na magam shaning a matu wenyi bandung ni jahkrat mai ai. Ndai shaman laika hta, akyu hpyi nna maram yu mai na bandung ni hte seng ai sumhpa ni lawm ai.​—Yak 1:5.

Ga shadawn, nta masha langai ngai aten galu ningshawng galaw lu hkra jawm karum ya lu na kun? Ahkying hpring na n re ngu myit nga yang, tinang hte masa bung ai ningshawng langai ngai hte ga shaga yu u. (Gsh 15:22) Dinghku nawku kaw ningshawng langai hpe hkrum san mai ai. Dai hpang, byin mai na chyarang galaw u. Ningshawng galaw ga yang, ya mung ningshawng galaw mai na masa nga, n nga myit yu u.

Nta masha nkau mi gaw, shata mi (sh) shata law law aten kadun ningshawng galaw lu na kun? N-gun atsam nau n nga yang, shani shagu aten kachyi chyi jaw nna, aten kadun ningshawng galaw mai ai. Aten tup bungli galaw ra ai majaw, jawng lung ra ai majaw, bat lapran hkan hkaw tsun bungli kaw n lu shang lawm tim, bungli hte jawng pat ai shani ni (sh) Bat Kru Ya hte Laban bat 5 nga ai shata ni hta ningshawng galaw mai ai. Aten galu ningshawng galaw na lamang hpe, shata hti laika hta, matsing da u.​—Gsh 21:5.

NDEN MARAI NGA AI NI TAI MU . . . LAM WOI NINGSHAWNG NI VIDEO HPE YU NNA, NDAI GA SAN A MAHTAI HPE TAM U:

• Sak jaw let galaw nga ai ningshawng ni hpe Yehowa lanu lahku ai lam, nauna Aman a mahkrum madup kaw na gara hku chye lu ai kun?