AHKYAK AI LAM: Chyum Laika hpe tinang hkrai hkaja ai lamang gaw, teng man ai lam a “nda de, dingdung de, tsaw de, sung de, kaning rai rai nga ai” hpe atsawm chye na hkra anhte hpe karum ya ai. (Ehp 3:18) Dai gaw, anhte hpe nhkru ai ndai mungkan hta mara n rawng ai ni, yubak n kap ai ni byin nga na matu hte “asak hkrung ya ai mungga hpe lang nga” na matu mung karum ya ai. (Hpl 2:15, 16) Anhte ra kadawn ai lam langai hpra hpe lata nna, Chyum Laika hpe tinang hkrai hkaja ai lamang galaw mai ai. Chyum Laika hti ai hte hkaja ai lamang a matu, gara hku aten grau jaw lu na kun?

GALAW MAI AI LAM:

• Tinang hkrai Chyum Laika hkaja ai lamang hta, laika buk hta rai rai, electronic jak hta rai rai, Chyum daw ni hpe laika tsi nsam hte mahkret nna, ka matsing ai lam galaw u

• Chyum Laika hti ai shaloi tinang hkum tinang ndai hku san u: ‘Kadai kun? Hpa lam kun? Galoi kun? Gara shara hta kun? Hpa majaw kun? Gara hku kun?’

• Tengman ai shiga ni hpe tam u. Lu mai ai tam sawk sagawn hkingrai ni hpe lang nna, ga baw (sh) Chyum daw ni hte tam u

• Hti nna chye wa ai lam ni gaw, nang hte gara hku seng ang ai hpe myit sawn sumru u

• Nang hkaja wa ai lam ni hpe, shani shagu na asak hkrung lam hta hkan sa u.​—⁠Luk 6:47, 48

NGANG NGANG LANG DA U​—⁠TANG DU AI TINANG HKRAI HKAJA AI LAMANG HKU NNA NGU AI VIDEO HPE YU NNA LAWU NA GA SAN NI HPE HTAI U:

• Tinang hkrai hkaja ai lamang hte seng nna, masha nkau mi gara hku tsun ai kun?

• Anhte a tinang hkrai hkaja ai lamang hpe hpang shagu, hpa majaw akyu hpyi ging ai kun?

• Chyum daw langai hpe grau chye na wa na matu, anhte hpe gara gaw karum ya lu ai kun?

• Anhte Chyum Laika hkaja ai shaloi, gara lam ni hku nna matsing da mai ai kun?

• Chyum Laika hpe hkaja ai shaloi, myit sawn sumru ai gaw hpa majaw grai ahkyak ai kun?

• Anhte hkaja wa ai lam ni hpe hpa galaw ging ai kun?