HKRISTAN PRAT HKRUN LAM
Shingra Tara Tsin-yam Byin Ngut Ai Hpang Karum Ya Mai
Dai ni aten hta shingra tara tsin-yam ni gaw lani hte lani grau grau law wa ai. Tsin-yam byin wa ai shaloi, hkye mawai bungli hpe galaw lu na matu atsawm lajang ra ai. Dai majaw, Uphkang Hpung gaw ginjaw garan rung shagu hta Shingra Tara Tsin-yam Hkye Mawai Dap hpe hpawng de wa ai.
Dai dap kaw na hpunau ni gaw shingra tara tsin-yam byin ai hpe chye ai shaloi, hkaw tsun masha ni a ra kadawn ai lam hpe karum ya lu hkra, buga na myitsu salang ni hpe kalang ta matut mahkai ai. Buga na hkaw tsun masha ni shanhte hkrai n dang hparan ai du hkra hten za mat ai nga yang, hkye mawai bungli hpe atsawm woi awn na matu, atsam hpring ai hpunau ni hpe ginjaw garan rung gaw lit jaw na re. Woi awn ai hpunau ni gaw, shawang lit gun na matu (sh) ra kadawn ai arai ni hpe alu bang na matu hpyi shawn na re. Shing nrai, shanhte gaw buga hta ra ai arai ni hpe mari nna garan ya na re.
Dai hku galaw ai gaw akyu law law nga ai. Buga na hpunau ni gaw shanhte hkrai shanhte galaw yang, n ra ai sha bungli law mat ai, kashuk kashak byin ai, alu gumhpraw hte arai ni majoi byin mat ai baw hpe koi lu na re.
Hkye mawai bungli a matu shawang lit gun kade daram ra na hte gumhpraw kade daram ra na hpe, ginjaw garan rung kaw na lit jaw da ai hpunau ni dawdan mai ai. Hkye mawai ai lam hpe alawan galaw lu hkra karum ya lu ai buga na asuya ni hpe mung tsun dan mai ai. Dai majaw, marai langai hkrai sha alu gumhpraw hta ai baw, hkye mawai arung arai ni sa ai baw (sh) tinang hpe karum n hpyi da yang, tsin-yam hkrum ai shara de sa ai baw hkum galaw.
Tsin-yam hkrum nga ai shaloi karum ya mayu na re. (Heb 13:16) Hpunau ni hpe anhte tsawra ai. Anhte hpa galaw lu ai kun? Ahkyak htum gaw, tsin-yam hkrum nga ai ni hte shanhte hpe karum ya nga ai ni a matu akyu hpyi ya mai ai. Mungkan grup alu hta shang lawm mai ai. Uphkang Hpung a lam matsun hte maren, dai alu ni hpe gara shara hta jailang yang kaja htum re ai hpe atsawm dawdan lu ai gaw, ginjaw garan rung ni re. Masha nan sa karum mayu yang, Buga Gawgap Shawang Lit Gun Shawk Shawn Laika (DC-50) mara nna anhte jin jin rai nga ai hpe madun mai ai.
BRAZI HTA HKA KABA AI LAM VIDEO HPE YU NNA, LAWU NA GA SAN NI HPE HTAI U:
2020 ning hta Brazi kaw hka kaba ai hpang Yehowa Sakse Ni a hkye mawai bungli hte seng nna, nang hpa hpe ra sharawng ai kun?
