Sharin shaga ai ngu ai gaw, lam matsun ya ai, hpaji jaw ai hpe tsun ai re. Raitim, shut ai lam hpe shading sharai ya ai hte kayat nna sharin shaga ai lam ni mung lawm ai. Anhte hpe Yehowa sharin shaga ya ai majaw, shi sharawng awng ai hku nawku dawjau lu nga ai re. (Rom 12:1; Heb 12:10, 11) Kalang lang, sharin shaga hkrum ai shaloi grai hkamsha chye ai. Raitim, dai gaw dingman ai lam hte shaman chyeju ni hpe lu shangun ai. (Gsh 10:7) Sharin shaga ai wa hte sharin hkrum ai wa gaw, hpa hpe myit dum ra ai kun?

Sharin shaga ai wa. Myitsu salang ni, kanu kawa ni hte kaga masha ni gaw sharin shaga ai shaloi, Yehowa zawn matsan dum ai myit, tsawra ai myit ni hte shakut nna sharin ra ai. (Yer 46:28) Aja awa daru sharin ai aten ni hta pyi, tsawra myit lawm ging ai.​—Tit 1:14.

Sharin shaga hkrum ai wa. Sharin shaga ai hpe gara kaw na mi lu lu, n nyet kau ai sha kalang ta hkan sa lu hkra shakut ging ai. (Gsh 3:11, 12) N hkum tsup ai masha ni hku nna, anhte yawng gaw sharin shaga ai lam amyu myu hpe ra nga ai. Dai hpe Chyum Laika hti ai (sh) nawku zuphpawng ni kawn lu ai. Shing nrai kalang lang, masha nkau mi hpe tara komiti kawn sharin shaga ra ai. Sharin shaga ai hpe hkap la hkan sa yang, htani htana asak lu na re.​—Gsh 10:17.

‘YEHOWA GAW TSAWRA AI WA HPE SHARIN SHAGA’ VIDEO HPE YU NNA, LAWU NA GA SAN NI HPE HTAI U:

• Hpunau Hkennan a prat hkrun lam gara hku hpang wa nna, gara hku galai shai wa ai kun?

• Yehowa kaw na tsawra myit hte sharin shaga ai lam hpe, shi gara kaw na lu wa ai kun?

• Shi a mahkrum madup gaw anhte hpe hpa sharin ya ai kun?