Teng Sha Sharin (bh) laika buk hte Sharin Ya (bhs) laika buk gaw nau n shai ai. Ndai hkingrai lahkawng gaw teng man ai tara langai hpe sha sharin ya nna, azin ayang ka da ai lam mung bung ai. Raitim, Sharin Ya laika buk hta chye na loi ai ga si hte chye na loi na hku sang lang dan ai. Teng Sha Sharin laika buk hpe chye na yak ai ni a matu, Sharin Ya laika buk hpe lajang da ya ai re. Sharin Ya laika buk hta bungjat daw n lawm ai sha, jahtum matsing lawm ai. Dai hta madung daw kaw lawm ai lam ni hte ga si nkau a lachyum hpe chye na loi hkra sang lang da ai. Daw shagu hta shachyen ya ai ga san ni (sh) bai ma­ram yu ai lawk ni n lawm sai. De a malai, madung daw hta sang lang dan ai hpe Kadun Dawk tsun dan ai lam lawm ai. Teng Sha Sharin laika buk hpe garan ai zawn, Sharin Ya laika buk hpe mung garan mai ai. Masat da ai shata n raitim, aten shagu hta garan mai ai. Laklai ai ndai Sharin Ya laika buk hpe Chyum Laika sharin ai aten hta gara hku jailang mai na kun?

Kadun Dawk: Teng Sha Sharin laika buk hte Chyum Laika sharin ai shaloi laika pang hpe hti ai, ngut yang ga san san ai. Dai zawn ladat hpe anhte law malawng galaw wa saga ai. Raitim, Chyum ga sharin gaw laika atsawm n chye hti ai (sh) atsawm n chye na ai ga hte hkaja nga ai ngu saga. Dai zawn masa hta nang gaw Sharin Ya laika buk a Kadun Dawk ngu ai daw hpe madung nna sharin ya mai ai. Madung daw ni hpe gaw, shi hkrai shi shakut nna hti na matu n-gun u. Teng Man Lam daw shagu gaw minit 15 daram hte sharin ya mai ai daw re. Kadun Dawk hta ahkri ahkrai n tsun da ai majaw, Chyum ga sharin a ra rawng ai lam hku hkan nna sharin ya ai wa gaw atsawm hkyen lajang da ra ai. Madung daw hpe sharin ya nga ai rai yang, bai maram ai lam galaw na matu Kadun Dawk hpe jailang mai ai.

Jahtum Matsing Ni: Madung daw hta lawm ai lam hku hkan nna jahtum matsing ni hpe azin ayang ka da ai. Sharin Ya laika buk kaw lawm ai jahtum matsing ni hpe gara aten hta sharin na hpe sha­rin ya ai wa gaw lata mai ai.