Law Law Tsun Ai: Lam shagu hpe nang sha sang lang dan ra ai ngu n sawn la ging ai. Yesu gaw ga san ni san nna masha ni myit yu wa hkra, teng man ai hku hkam la wa hkra karum ya wa ai. (Mah. 17:​24-27) Ga san ni gaw Chyum Laika hkaja ai lamang hpe grau myit lawm wa shangun nna, Chyum ga sharin a chye na lam hte kamsham lam hpe chye lu hkra nang hpe karum ya ai. (be 253 ¶3-4) Ga san san ngut ai hpang, mahtai hpe myit galu ai hte la u. Shut ai mahtai hpe jaw yang, kalang ta jaw ai mahtai hpe tsun dan na malai, ga san ni kahtap san nna jaw ai mahtai lu hkra karum ya u. (be 238 ¶1-2) Chyum Laika lam ni hpe Chyum ga sharin hkap la lu ai daram sha sharin ya u.​—⁠be 230 ¶4.

Chye Na Yak Shangun Ai: Hkaja nga ai lam hte seng nna nang chye da ai lam yawng tsun dan ai hpe koi ra ai. (Yaw. 16:12) Laika pang a madung lam hpe sha myit maju jung u. (be 226 ¶4-5) Ahkri ahkrai tsun dan ai gaw myit lawm shangun yang pyi, madung lam ni mat mat chye ai. (be 235 ¶3) Madung lam hpe Chyum ga sharin chye na sai nga yang, kaga laika pang hpe bai hkaja u. 

Kalang Ta Mahkra Sharin Ai: Anhte a yaw shada lam gaw, lawan ladan sharin ya na malai, Chyum ga sharin a myit masin de shang hkra sharin na matu re. (Luk. 24:32) Hkaja ai daw a madung Chyum daw ni hpe dan dawng hkra sharin nna, Ka­rai Mungga a dagu hpe akyu jashawn u. (2 Kor. 10:4; Heb. 4:12; be 144 ¶1-3) Chye na loi ai ga shadawn ni hpe lang u. (be 245 ¶2-4) Chyum ga sharin a mayak mahkak ni hte shi kamsham ai lam hpe myit ya nna, shi hte htap htuk ai hku galai shai nna sha­rin ya u. Ndai zawn san mai ai: “Ya sharin la ai lam hte seng nna nang gara hku hkam sha ai kun?” “Ndai lam kaw nna Yehowa a lam hpa chye lu ai kun?” “Ndai lam matsun ni hpe ta tut hkan sa yang hpa akyu lu na kun?”​—⁠be 238 ¶3-5; 259 ¶1.