1, 2. Akyu hpyi lu ai gaw laksan kumhpa re ai ngu hpa majaw lu tsun ai kun? Yehowa ra sharawng ai hku hpa majaw akyu hpyi ra ai kun?

NINGGAWN tawa hte shing daw dat yang, mungkan ga gaw grai kaji mat ai. Mungkan hpe Yehowa yu ai shaloi, shinggyim masha yawng gaw ntsin nsi zawn sha re. (Shakawn 115:15; Esaia 40:15) Ninggawn tawa hte shing daw dat yang anhte gaw grai kaji tim, Shakawn Kungdawn 145:18, 19 hta ndai hku tsun da ai: “Yehowa gaw shi hpe shaga ai ni nlang hte hte, sadi sahka hte shi hpe shaga ai ni nlang hte hte, ni nga ai. Shi hpe hkrit kamyin ai ni a ra ai hku shi shadik ya nna, shanhte a jahtau ai hpe shi na la nna, shanhte hpe hkye la mu ai.” Anhte gaw ahkaw ahkang kaba lu da ai. Chyahtum chyalai n-gun rawng ai Hpan Madu Yehowa gaw, anhte hte nihtep mayu nna anhte a akyu hpyi ga hpe mung madat ya mayu ai. Akyu hpyi lu ai lam gaw, anhte langai hpra hpe Yehowa jaw da ai laksan kumhpa re.

² Raitim, Yehowa ra sharawng ai hku anhte hpyi yang she shi madat ya na re. Anhte gara hku galaw lu na kun? Akyu hpyi ai hte seng nna Chyum Laika tsun ai hpe yu yu ga.

3. Yehowa hpang hpa majaw akyu hpyi ging ai kun?

³ Yehowa gaw shi hpang de akyu hpyi shangun mayu ai. Dai hpe anhte gara hku chye lu ai kun? Chyeju hte Hpilipi 4:6, 7 hpe hti u. Tsawra myit hte saw shaga ai ndai lam hpe myit yu ga. Ninggawn tawa uphkang madu gaw nang  hpe grai lanu lahku nna, na a manghkang ni hte hkamsha ai lam ni hpe tsun dan shangun mayu ai.

4. Yehowa hte grau hku hkau wa hkra gara hku akyu hpyi ra ai kun?

⁴ Akyu hpyi ai lam gaw, Yehowa hte nihtep wa hkra karum ya ai. Manang shada da myit mang ai lam, myitru myit tsang lam ni hte hkamsha ai lam ni hpe tsun hkat ai shaloi, shan a hku hkau lam grau ngang kang wa ai. Yehowa hpang akyu hpyi yang mung dai hte maren sha re. Chyum Laika hku nna shi a myit mang ai lam ni, nang hte seng nna hkamsha ai lam ni hte htawm hpang hta shi galaw ya na lam ni hpe tsun dan ai. Na a hkamsha ai lam ni hpe akyu hpyi nna galoi mung tsun dan mai ai. Dai hku galaw yang, Yehowa hte na a hku hkau lam grau ngang kang wa na re.—Yaku 4:8.

5. Akyu hpyi ga yawng hpe Yehowa n madat ya ai lam anhte gara hku chye lu ai kun?

⁵ Akyu hpyi ga yawng hpe Yehowa madat ya ai kun? N madat ya ai. Myihtoi Esaia prat hta Yehowa gaw, Israela masha ni hpe “Nanhte lata ladawn yang, ngai myi man  makoi mat na nngai; gaja wa, nanhte akroi anoi akyu hpyi ti mung, ngai n madat na nngai: nanhte a lata sai hte hpring nga ai” nga nna tsun wa ai. (Esaia 1:15) Dai majaw, anhte galaw ai lam ni hpe n sadi yang, Yehowa hte tsan mat wa chye nna, anhte a akyu hpyi ga hpe mung n madat ya ai baw pyi byin chye ai.

6. Makam masham gaw hpa majaw grai ahkyak ai kun? Nang makam masham nga ai hpe gara hku madun na kun?

⁶ Anhte a akyu hpyi ga Yehowa madat ya na hpe ra sharawng yang, anhte shi hpe kam sham ra ai. (Marku 11:24) “Makam masham n rawng yang gaw, shi a man e sharawng awng ai lu la na n rai; kaning rai nme law, Karai Kasang kaw sit shang ai wa gaw, Karai Kasang nga nga ai mung, shi e hkan tam ai ni hpe chyeju htang jaw lu ai mung, kam sham lu na rai nga ai” nga nna kasa Pawlu tsun wa ai. (Hebre 11:6) Anhte kam sham ai ngu tsun ai hte sha n hkum tsup ai. Shani shagu Yehowa a ga madat nna, anhte a makam masham hpe sakse madun ra ai.—Yaku 2:26 hpe hti u.

7. (a) Yehowa hpe akyu hpyi ai shaloi hkungga ai hte shagrit shanem let hpa majaw hpyi ra ai kun? (b) Anhte akyu hpyi ai shaloi ding man ai lam gara hku madun na kun?

⁷ Yehowa hpe hkungga ai hte shagrit shanem let akyu hpyi ra ai. Hpa majaw kun? Hkawhkam (sh) gumsan magam hte ga shaga yang, hkungga let shaga na re. Yehowa gaw, Chyahtum Chyalai n-gun rawng ai Karai Kasang re ai majaw, shi hte ga shaga yang grau hkungga nna shagrit shanem let tsun ging ai n re ni? (Ningpawt 17:1; Shakawn 138:6) Anhte akyu hpyi ai shaloi, ga bai kahtap htap tsun ai hku n re ai sha, kraw kata na ga si ni hte ding man ai hku akyu hpyi ra ai.—Mahte 6:7, 8.

8. Anhte lama ma a matu akyu hpyi ngut ai hpang hpa hpe mung galaw ra na kun?

⁸ Anhte lama ma a matu hpyi ai shaloi, hpyi ai hte maren galaw ging ai lam yawng hpe galaw ra ai. Ga shadawn, anhte lu na sha na matu Yehowa hpang akyu hpyi yang, anhte n mai lagawn ai. Bungli hpe shakut shaja nna  galaw ra ai. (Mahte 6:11; 2 Htesaloni 3:10) Shut ai lama ma galaw nga ai hpe jahkring kau na matu, Yehowa hpe karum hpyi yang, agung alau hkrum chye ai masa yawng hpe koi ra ai. (Kolose 3:5) Akyu hpyi ai hte seng nna, san chye ai ga san nkau mi hpe yu yu ga.

9. Anhte kadai kaw akyu hpyi ra ai kun? Akyu hpyi ai hte seng nna Yawhan 14:6 gaw anhte hpe hpa sharin ya ai kun?

⁹ Anhte kadai kaw akyu hpyi ra ai kun? Yesu gaw “Sumsing lamu na anhte a Wa e” nga nna, akyu hpyi na matu sharin ya wa ai. (Mahte 6:9) “Lam gaw ngai rai nga nngai, teng man ai hte asak mung, ngai rai nga nngai: ngai hta nna n rai yang gaw, kadai mung nye Wa kaw n du wa lu ai” nga nna mung shi tsun ai. (Yawhan 14:6) Dai majaw, Yesu kaw nna sha Yehowa hpang anhte akyu hpyi ra ai. Yesu kaw nna akyu hpyi ai lachyum gaw hpa rai kun? Akyu hpyi ga hpe Yehowa hkap la na matu, Yesu hpe Yehowa jaw da ai laksan ahkang aya hpe hkungga ai lachyum re. Anhte hkaja wa sai hte maren, Yesu gaw yubak hte si ai kaw nna, anhte hpe hkye la na matu du sa ai. (Yawhan 3:16; Roma 5:12) Yehowa gaw Yesu hpe Tara Agyi hte Hkinjawng Agyi hku nna aya tang da ai.—Yawhan 5:22; Hebre 6:20.

10. Anhte akyu hpyi yang gara hku nga ra ai kun? Sang lang dan u.

¹⁰ Anhte akyu hpyi yang gara hku nga ra ai kun? Anhte akyu hpyi ai shaloi hput di nna, dung nna, tsap nna sha hpyi ra ai nga nna Yehowa n masat da ai. Yehowa hpe hkungga ai lam amyu myu hte akyu hpyi mai ai lam Chyum Laika hta tsun da ai. (1 Hkawhkam Labau 17:16; Nehemia 8:6; Daniela 6:10; Marku 11:25) Akyu hpyi ai shaloi Yehowa a matu ahkyak htum gaw, anhte a hkrang n re ai sha myit masin re. Shani, shana gara aten, gara shara hta raitim, nsen pru tim, n pru tim akyu hpyi mai ai. Anhte akyu hpyi ai shaloi kadai n na yang pyi Yehowa na lu ai.—Nehemia 2:1-6.

11. Yehowa hpe akyu hpyi mai ai lam nkau mi gaw hpa rai a ta?

 ¹¹ Hpa a matu akyu hpyi mai ai kun? Yehowa hkap la ai gara hpe raitim anhte hpyi mai ai. “Karai Kasang a myit ai hku hte maren, anhte lama ma hpyi ga yang gaw, shi anhte hpe madat mara na ra ai” nga nna Chyum Laika hta tsun da ai. (1 Yawhan 5:14) Tinang a matu akyu hpyi mai ai kun? Mai ai. Grai hkau ai manang hte shaga ai zawn, Yehowa hpang akyu hpyi mai ai. Anhte a myit masin hta nga ai lam yawng, Yehowa hpe tsun dan mai ai. (Shakawn 62:8) Anhte teng man ai hpe galaw lu hkra, shi a chyoi pra ai wenyi jaw na matu hpyi mai ai. (Luka 11:13) Kaja ai hpe daw dan lu hkra, nyan hpaji jaw na matu hte yakhkak ai lam ni hpe hkam sharang lu hkra, n-gun atsam jaw na matu mung hpyi mai ai. (Yaku 1:5) Anhte a mara hpe raw ya na matu Yehowa hpang akyu hpyi ra ai. (Ehpesu 1:3, 7) Nta masha ni, nawku hpung hta nga ai hpunau nauna ni a matu mung akyu hpyi mai ai.—Kasa 12:5; Kolose 4:12.

12. Anhte a akyu hpyi ga hta ahkyak htum gaw hpa rai ra ai kun?

¹² Akyu hpyi ai shaloi gara lam hpe ahkyak shatai nna hpyi ra ai kun? Yehowa hte shi a myit ra ai lam re. Anhte hpe shi galaw ya ai lam yawng a matu myit masin mahkra hte shi hpe chyeju dum ra ai. (1 Hkawhkam Labau 29:10-13) Yesu mungkan hta nga ai shaloi, sape ni hpe gara hku akyu hpyi na lam sharin ya wa ai. (Mahte 6:9-13 hpe hti u.) Shawng nnan Karai Kasang a amying chyoi pra na matu anhte hpe akyu hpyi shangun ai. Dai gaw, Karai Kasang a amying ningsang hpe chyoi pra ai hku mu mada ra ai lachyum re. Bai nna, Karai Kasang a mungdan du wa na hte mungkan ga hta Yehowa myit ra ai hku byin wa hkra, akyu hpyi na matu mung Yesu tsun ai. Dai ahkyak ai lam ni hpyi ngut ai hpang she, anhte a matu hpyi ra ai lam Yesu tsun ai. Anhte a akyu hpyi ai lam hta Yehowa hte shi a myit ra ai hpe shawng tawn yang, anhte a matu ahkyak htum gaw hpa re ai hpe madun nga ai.

13. Akyu hpyi yang aten kade na ra ai kun?

 ¹³ Akyu hpyi yang aten kade na ra ai kun? Chyum Laika hta n tsun da ai. Anhte a masa hta hkan nna galu ai (sh) kadun ai hku hpyi mai ai. Ga shadawn, shat sha akyu hpyi yang kadun tim, Yehowa hpe chyeju dum ai lam (sh) anhte a myitru myit tsang lam ni tsun ai shaloi gaw galu na re. (1 Samuela 1:12, 15) Yesu a prat hta masha nkau mi gaw  masha yu kaba na matu, galu galang hpyi ai zawn anhte galaw na n re. (Luka 20:46, 47) Dai zawn hpyi ai hpe Yehowa n ra ai. Myit masin mahkra hte hpyi ai hpe sha Yehowa ra sharawng ai.

14. Kade lang akyu hpyi ra ai kun? Dai hte seng nna Yehowa a lam hpa sharin ya ai kun?

¹⁴ Kade lang akyu hpyi ra ai kun? Yehowa gaw shi hpe galoi mung akyu hpyi na matu saw shaga ai. “Akyu hpyi nga mu,” “akyu hpyi ai hta htep lahti tut rai nga mu,” “n sim n sa akyu hpyi nga mu” nga nna Chyum Laika hta tsun da ai. (Mahte 26:41; Roma 12:12; 1 Htesaloni 5:17) Yehowa gaw anhte a akyu hpyi ga hpe madat na matu jin jin rai nga ai. Shi a tsawra myit hte shawang myit hpe shani shagu chyeju dum ging ai. Shi a lam matsun, n-gun atsam hte shalan shabran lam lu na matu mung hpyi mai ai. Yehowa hpang akyu hpyi lu ai ahkaw ahkang hpe manu shadan yang, kaning re ai masa hta raitim anhte akyu hpyi na re.

15. Akyu hpyi ngut ai shaloi hpa majaw “amen” ngu tsun ra ai kun?

 ¹⁵ Akyu hpyi ngut ai shaloi “amen” ngu anhte hpa majaw tsun ra ai kun? “Amen” ngu ai gaw, “teng sha byin u ga” (sh) “hpring tsup u ga” ngu ai lachyum re. Amen ngu tsun ai shaloi akyu hpyi ga ni hpe myit ding man let hpyi ai, myit hkrum ai ngu madun ai re. (Shakawn 41:13) Shawa hpawng akyu hpyi ga jahtum hta mung, nsen pru nna (sh) n pru nna raitim “amen” ngu tsun ai gaw, akyu hpyi ga hpe myit hkrum ai lam madun dan ai re.—1 Hkawhkam Labau 16:36; 1 Korinhtu 14:16.

16. Anhte a akyu hpyi ga hpe Yehowa teng sha mahtai jaw ai kun? Sang lang dan u.

¹⁶ Anhte a akyu hpyi ga ni hpe Yehowa teng sha mahtai jaw ai kun? Jaw ai. Shi hpe “akyu hpyi ai ga madat mara ai wa” nga nna Chyum Laika hta tsun da ai. (Shakawn 65:2) Ding hpring ai masha wan law law a akyu hpyi ga hpe madat ya nna, lam amyu myu hte mahtai jaw ai.

17. Yehowa gaw anhte a akyu hpyi ga hpe mahtai jaw na matu, lamu kasa ni hte mungkan hta nga ai shi a mayam ni hpe gara hku shangun ai kun?

¹⁷ Yehowa gaw anhte a akyu hpyi ga hpe mahtai jaw na matu, lamu kasa ni hte mungkan ga ntsa hta nga ai shi a mayam ni hpe shangun ai. (Hebre 1:13, 14) Chyum Laika chye na na matu akyu hpyi ngut ai hpang kade n na yang, Yehowa Sakse langai du wa ai mahkrum madup ni law law nga ai. Mungkan ting “kabu gara shiga” hkaw tsun ai hta lamu kasa ni lawm ai lam Chyum Laika hta tsun da ai. (Shingran 14:6 hpe hti u.) Anhte kaw nna law malawng gaw, manghkang (sh) ra kadawn ai lam langai ngai a matu, Yehowa hpang laksan akyu hpyi ai hpang Hkristan hpunau ni kaw nna, karum shingtau lam lu wa ai mahkrum madup ni mung nga ai.—Ga Shagawp 12:25; Yaku 2:16.

18. Akyu hpyi ga hpe mahtai jaw na matu, Chyum Laika hte shi a chyoi pra ai wenyi hpe Yehowa gara hku akyu jashawn ai kun?

 ¹⁸ Anhte a akyu hpyi ga ni hpe mahtai jaw na matu, shi a chyoi pra ai wenyi hpe Yehowa akyu jashawn ai. Manghkang hparan lu na matu anhte akyu hpyi ai shaloi, anhte hpe lam matsun na matu hte n-gun atsam jaw na matu, shi a chyoi pra ai wenyi hpe akyu jashawn na re. (2 Korinhtu 4:7) Hpaji rawng ai hku dawdan lu hkra Chyum Laika hku nna mung, anhte a akyu hpyi ai ga hpe Yehowa mahtai jaw ya ai. Anhte Chyum Laika hti ai shaloi, anhte hpe karum ya lu ai chyum daw ni mu wa na re. Zuphpawng hta marai langai ngai jaw ai mahtai (sh) myitsu salang langai htawn ai mungga kaw nna mung, Yehowa gaw anhte hpe myit shalan ya ai.—Galati 6:1.

19. Kalang lang, anhte a akyu hpyi ga hpe Yehowa mahtai n jaw ai zawn hpa majaw byin nga ai kun?

¹⁹ Kalang lang, ‘Yehowa gaw nye a akyu hpyi ga hpe ya du hkra hpa majaw mahtai n jaw ai kun?’ nga nna myit chye ai. Anhte a akyu hpyi ga hpe gara aten hta, gara hku mahtai jaw na hpe shi chye ai hpe dum u. Anhte ra kadawn ai lam hpe shi chye ai. Anhte lama ma hpe matut nna akyu hpyi ai gaw, dai hpe gaja wa ra kadawn ai lam, shi hpe kamhpa ai lam madun ai re. (Luka 11:5-10) Kalang lang Yehowa gaw n myit mada ai lam hku nna, anhte a akyu hpyi ga hpe mahtai jaw ai. Ga shadawn, yakhkak ai aten hta akyu hpyi ai shaloi, manghkang ni hpe yeng seng ya na malai, hkam sharang lu ai n-gun atsam jaw na re.—Hpilipi 4:13 hpe hti u.

20. Anhte Yehowa hpe hpa majaw ayan akyu hpyi ra ai kun?

²⁰ Yehowa hpe akyu hpyi lu ai gaw laksan ahkaw ahkang n rai ni! Shi madat ya na hpe anhte kam mai ai. (Shakawn 145:18) Myit masin mahkra hte Yehowa hpe anhte galoi mung akyu hpyi yang, shi hte grau nna hku hkau wa na.