1, 2. Masha law law gara hku san ma ai kun?

TSUNAMI tsin-yam gaw mare hpe jahten kau ai. Masha langai nawku jawng de shang nna, sinat hte masha ni hpe gap sat kau ai. Mawng ana (Cancer) a majaw, ma manga a kanu si mat ai.

² Dai zawn re ai tsin-yam tsindam hte yawn hpa lam ni byin nga ai majaw, masha law law gaw “hpa majaw kun?” nga nna san ma ai. Yakhkak ai hte n ju n dawng ai lam ni, mungkan hta hpa majaw law nga ai kun? nga nna masha law law san ma ai. Nang mung san ga ai kun?

3, 4. (a) Habaku gaw gara ga san hpe san wa ai kun? (b) Mungkan a yakhkak ai lam hte seng nna Yehowa gara hku hkam sha ai kun?

³ Karai Kasang hpe kam sham ai ni mung, dai zawn ga san ni hpe san ga ai lam, Chyum Laika hta lawm ai. Ga shadawn, myihtoi Habaku gaw Yehowa hpe ndai hku san wa ai: “Nang hpa majaw n shawp n kap ai amu, ngai hpe madun dan nna, myit magaw ai lam mu shangun nga n ta? hten byak ai hte kashun kashe, nye a man e rai nga nna n dang kalang hkat ai hte, ga law ga la ai, law htam nga ai.”—Habaku 1:3.

⁴ Karai Kasang gaw Habaku hpe mahtai jaw nna, mabyin masa hpe shading sharai ya na ngu ga sadi jaw ai hpe Habaku 2:2, 3 hta anhte mu lu ai. Yehowa gaw masha ni hpe grai tsawra ai. “Shi nanhte hpe myit dum ya nga ai” nga nna Chyum Laika hta tsun da ai. (1 Petru 5:7) Yakhkak ai lam hpe anhte n ju ai hta na Karai Kasang grau n ju ai. (Esaia 55:8, 9) Rai yang, mungkan hta yakhkak ai lam hpa majaw grau law wa nga ai kun? Dai ga san hpe hkaja yu ga.

5. Yakhkak ai hte seng nna makam masham ningbaw nkau mi gaw gara hku tsun a ta? Chyum Laika hpa tsun ai kun?

⁵ Makam masham ningbaw nkau mi gaw, masha ni jamjau hkrum yang, Karai Kasang a myit sha re ngu tsun ma ai. Yawn hpa lam ni gaw Karai Kasang dawdan da ai hte maren byin nga ai, dai hpe chye na na matu yak la ai ngu masha nkau mi tsun ma ai. Ma ni si mat ai shaloi Karai Kasang gaw, sumsing lamu hta shi hte rau nga na matu, woi la kau ai re ngu nkau mi tsun ma ai. Raitim, dai gaw n teng ai. Yehowa gaw n kaja ai hpe galoi mung n galaw ai. Chyum Laika hta “tara tawt lai ai gaw Karai Wa hte, shut hpyit ai gaw Chyahtum Chyalai n-gun rawng ai wa hte, tsan nga u ga” nga nna tsun da ai.—Yoba 34:10.

6. Mungkan a yakhkak ai lam hte seng nna Karai Kasang hpe hpa majaw mara shagun ma ai kun?

⁶ Yakhkak ai lam a majaw masha law law Karai Kasang hpe mara shagun ai gaw, shi hpe ndai mungkan a uphkang madu ngu shadu ai majaw re. Raitim, Daw 3 hta anhte hkaja wa ai hte maren, ndai mungkan hpe teng sha uphkang nga ai wa gaw Satan re.

7, 8. Mungkan hta yakhkak ai lam ni hpa majaw law nga ai kun?

⁷ Chyum Laika hta “mungkan ting gaw dai n hkru ai wa hta e lup mat wa ai” nga nna tsun da ai. (1 Yawhan 5:19) Mungkan a uphkang madu re ai Satan gaw grai n hkru nna matse ai. Shi gaw “mungkan ga ting hpe hkalem” nga ai. (Shingran 12:9) Masha law law gaw shi a akyang lailen hpe hkan nga ma ai. Dai majaw, mungkan hta masu ai, nju ndawng ai hte n hkru ai lam ni hpring nga ai re.

⁸ Mungkan hta yakhkak ai lam ni hpa majaw law nga ai hte seng nna, kaga lam ni naw nga ai. Adam yan Ewa ninghkap ngut ai hpang shan a kasha ni yubak kap wa ai. Yubak a majaw, masha shada da n hkru ai lam ni galaw nga ma ai. Langai hte langai shing jawng mayu wa ma ai. Dai majaw  gasat gala ai, majan sa ai, kaga ni hpe adip arip re ai lam ni galaw wa ma ai. (Hpaji Ningli 4:1; 8:9) Kalang lang gaw “aten ladaw hte, ang wa ai hte maren” yakhkak ai lam ni hkrum nga ai. (Hpaji Ningli 9:11) Tsun mayu ai gaw, n du ging ai aten hte shara hta du nga ai majaw, tsin-yam ni hpe ang katut hkrum nga ai re.

9. Yakhkak ai lam ni hpe byin na ahkang jaw ai gaw, Yehowa hta kaja ai yaw shada lam nga ai hpe anhte gara hku chye lu ai kun?

⁹ Yehowa gaw, kaja ai hpe sha galoi mung galaw ai. Adip arip ai, upadi tawt lai ai hte majan a majaw shi hpe mara n shagun ging ai. N bung laru, nnang nawn hte hka kaba ai zawn re ai tsin-yam ni hpe Karai Kasang shabyin ai n re. ‘Yehowa gaw, ninggawn tawa hta hpung atsam kaba htum ai wa rai yang, n hkru ai lam ni byin nga ai hpe hpa majaw n yeng seng kau ai kun?’ nga nna nang san ga na re. Karai Kasang anhte hpe grai lanu lahku ai lam anhte chye nga ga ai. Dai majaw, yakhkak ai lam ni hpe byin na ahkang jaw ai gaw, shi hta kaja ai yaw shada lam nga nna re.—1 Yawhan 4:8.

10. Satan gaw Yehowa hpe gara hku jahte tam wa ai kun?

¹⁰ Edin sun hta Satan gaw, Adam yan Ewa hpe hkalem wa ai. Karai Kasang gaw n kaja ai uphkang madu re ngu Satan jahte tam wa ai. Karai Kasang gaw Adam yan Ewa hpe kaja ai lama ma n jaw ai sha ip da ai ngu Satan masu tsun wa ai. Satan gaw Yehowa hta shi grau kaja ai uphkang madu re ngu masha ni hpe kam shangun mayu ai. Masha ni gaw Yehowa a karum shingtau lam n ra ai ngu nna mung kam shangun mayu ai.—Ningpawt 3:2-5; Jahtum Matsing 26 hpe yu u.

11. Anhte gara ga san a mahtai hpe chye ra ai kun?

¹¹ Adam yan Ewa gaw Yehowa a ga n madat ai sha n-ga ninghkap wa ma ai. Shut ai jaw ai hpe shanhte hkrai daw dan lu ai ngu shadu ma ai. Yehowa gaw anhte a matu kaja htum hpe chye ai, ninghkap ai ni gaw shut ai ngu ai hpe gara hku sakse madun na kun?

12, 13. (a) Yehowa gaw ninghkap ai ni hpe hpa majaw kalang ta n yeng seng kau ai kun? (b) Yehowa gaw Satan hpe ndai mungkan uphkang na matu hte masha shada da uphkang na matu, hpa majaw ahkang jaw wa ai kun?

 ¹² Yehowa gaw Adam yan Ewa hpe kalang ta n yeng seng kau ai. De a malai, shanhte hpe kashu kasha shaprat na ahkang jaw wa ai. Tinang ra ai uphkang madu hpe lata la na matu, Adam yan Ewa a kasha ni hpe mung Yehowa ahkang jaw wa ai. Mungkan hta hkum tsup ai masha ni hte hpring wa na ngu ai Yehowa a yaw shada lam gaw, Satan gara hku jahten tim dik wa na re.—Ningpawt 1:28; Esaia 55:10, 11.

¹³ Satan gaw wan hku law ai lamu kasa ni a man hta, Yehowa hpe jahte tam wa ai. (Yoba 38:7; Shingran 5:11) Dai majaw, Satan jahte tam ai gaw shut ai hpe sakse madun lu na matu Yehowa aten jaw wa ai. Shinggyim masha ni gaw Yehowa Karai Kasang n lawm ai sha, Satan a uphkang ai npu hta tinang hkrai awng dang hkra uphkang lu na kun? ngu ai hpe mung sakse madun lu na matu aten jaw wa ai.

14. Ahkying gaw hpa hpe sakse madun wa sai kun?

¹⁴ Shinggyim masha ni uphkang ai shaning hkying hku na wa tim, awng dang lam n nga ai hpe mu lu ai. Dai hpe yu yang, Satan gaw masu ai wa re ai hpe sakse madun nga ai. Masha gaw Karai Kasang a karum shingtau lam ra ai. “Yehowa e, shinggyim masha gaw tinang lam hpe n up nga ai, ngai chye n ngai; hkawm wa yang pyi, shi gaw tinang lagaw lahkam hpe hkang lu ai n rai” nga nna myihtoi Yeremia tsun wa ai ga gaw teng nga ai.—Yeremia 10:23.

15, 16. (a) Yehowa gaw yakhkak ai hpe hpa majaw grai na hkra byin shangun ai kun? (b) Satan shabyin ai manghkang ni hpe Yehowa hpa majaw n yeng seng ya ai kun?

¹⁵ Yehowa gaw mayak mahkak ni hpe grai na hkra byin na ahkang hpa majaw jaw da ai kun? N hkru ai lam ni hpe  hpa majaw n jahkring kau ai kun? Satan uphkang yang awng dang lam n nga ai hpe sakse madun na matu aten ra ai. Masha gaw uphkang ladat amyu myu hte shakut wa ti mung awng dang lam n nga ai. Hpungtang hpaji hte ladat hpaji ni rawt jat wa tim n tara ai, matsan ai, upadi tawt lai ai hte majan ni gaw moi na hta pyi grau grau law wa ai. Karai Kasang n lawm ai sha anhte shada da uphkang ai gaw n awng dang lu ai.

¹⁶ Satan a majaw byin nga ai manghkang ni hpe Yehowa n hparan ya ai. Dai hku hparan ya yang, Satan uphkang ai hpe karum ya ai hte bung mat na majaw, Yehowa dai hku galoi mung galaw na n re. Shinggyim masha shada da awng dang hkra, uphkang lu ai nga nna mung Satan tsun ai. Dai gaw masu ai ga re. Shinggyim uphkang lam hpe Yehowa karum ya jang, Satan a masu ai ga hpe madi shadaw ai hte bung mat na. Yehowa dai hku galaw na n re.—Hebre 6:18.

17, 18. Satan a majaw hten za mat ai ni hpe Yehowa hpa galaw ya na kun?

¹⁷ Satan hte masha ni ninghkap ai majaw hten za mat ai ni yawng hpe bai kaja hkra, Yehowa galaw ya lu ai kun? Galaw ya lu ai. Shi hta atsam marai nga ai. Satan a mara tam ai ga yawng hpe mahtai jaw lu na aten Yehowa chye ai. Shi yaw shada da ai hte maren, mungkan hpe hparadisu byin hkra galaw ya na re. “Lup ni hta rawng nga ai ni” yawng, bai hkrung rawt wa na re. (Yawhan 5:28, 29) Shinggyim masha ni gaw machyi ai, si ai ni galoi mung byin sana n re. Satan a majaw hten za mat ai yawng hpe bai kaja hkra Yesu galaw ya na re. “Nat a amu bungli hpe sharun jahten” kau na matu, Yehowa gaw Yesu hpe shangun na re. (1 Yawhan 3:8) Yehowa myit galu ya ai laman, shi hpe chye chyang wa nna anhte a uphkang madu hku nna hkap la lu ai majaw anhte shi hpe grai chyeju dum ai. (2 Petru 3:9, 10 hpe hti u.) Anhte yakhkak hkrum nga yang, hkam jan lu hkra mung shi karum ya nga ai.—Yawhan 4:23; 1 Korinhtu 10:13 hpe hti u.

 ¹⁸ Yehowa gaw uphkang madu hku nna shi hpe lata na matu, atik anang n galaw ai. Shi gaw shinggyim masha ni hpe, myit ra ai hku lata la na ahkang jaw da ai. Dai manu dan ai ahkang gaw, anhte a matu hpa lachyum nga ai hpe hkaja yu ga.

19. Yehowa gaw anhte hpe hpa ahkang jaw da ai kun? Dai ahkang a matu hpa majaw chyeju dum ra ai kun?

¹⁹ Yehowa gaw anhte hpe myit ra ai hku lata la lu ai ahkang jaw da ai majaw, dusat ni hte grai shai ai. Dusat ni gaw shingra tara hpe hkan nna sha asak hkrung ma ai. Raitim, anhte gaw gara hku asak hkrung na hpe lata la mai ai. Yehowa myit ra ai lam gara hku galaw na hpe mung dawdan mai ai. (Ga Shagawp 30:24) Anhte gaw hkang ai hku sha galaw lu ai jak hte n bung ai. Anhte hpa galaw mayu ai, kadai hte manang byin mayu ai, anhte a prat hta hpa byin mayu ai hpe myit ra ai hku lata la mai ai. Yehowa gaw anhte a prat hpe ngwi pyaw shangun mayu ai.

20, 21. Ya, nang kaja htum hpa galaw lu na kun?

²⁰ Yehowa gaw shi hpe tsawra shangun mayu ai. (Mahte 22:37, 38) Atik anang tsun shangun ai majaw n re ai sha, myit kraw kata na “tsawra ai” ngu tsun ai ma a nsen hpe na mayu ai kawa hte Yehowa bung ai. Yehowa gaw shi hpe nawku na, n nawku na hpe myit ra ai hku lata la na ahkang jaw da ai. Satan hte Adam yan Ewa gaw Yehowa hpe n nawku na matu lata la ma ai. Myit ra ai hku lata na ahkang hpe nang gara hku akyu jashawn na kun?

²¹ Yehowa hpe nawku na matu sharawng awng let lata u. Wan hku law ai masha ni gaw, Satan hpe ninghkap nna Karai Kasang ra sharawng ai hpe galaw na matu dawdan da ma ai. (Ga Shagawp 27:11) Yakhkak ai lam n nga ai Karai Kasang a mungkan nnan hta nga lu na matu, ya nang hpa galaw ra na kun? Hpang na daw hta ndai ga san a mahtai hpe chye lu na re.