Babelon a kaga hkawhkam langai gaw Medi masha Dari re. Daniela gaw kaga masha ni hta grau nna, kung kyang ai hpe Dari mu ai. Dai majaw, Dari gaw Daniela hpe mungdan hta nga ai ahkyak htum masha ni hpe uphkang na matu, aya tang dat ai. Dai masha ni gaw Daniela hpe manawn wa nna, sat kau mayu wa ma ai. Daniela gaw Yehowa hpe lani mi hta masum lang, galoi mung akyu hpyi ai lam shanhte chye ai majaw, Dari hpe ndai hku sa tsun ma ai: ‘Hkawhkam wa e, nang langai hpe sha masha yawng akyu hpyi na matu, tara jahkrat dat u. Dai tara hpe tawt lai nna, nang hpe n re ai sha, kaga hpe akyu hpyi ai wa kadai hpe mung, hkanghkyi nhkun de kabai bang kau dat u.’ Dari gaw shanhte tsun ai hpe grai ra sharawng mat ai majaw, dai tara laika hpe amying dazik shakap dat ai.

Dai tara nnan pru ai lam hpe Daniela na ngut ai hpang, shi a nta de wa mat ai. Shi gaw hpaw nga ai hkuwawt chyinghka shawng hta, hput di di let Yehowa kaw akyu hpyi ai. Dai shaloi, Daniela hpe manawn ai masha ni gaw, shi nta de akajawng shang wa nna, Daniela akyu hpyi nga ai hpe sa mu ma ai. Shanhte gaw Dari hpang de alawan sa mat nna, ndai hku sa tsun ai: ‘Daniela gaw na a ga hpe n madat nga ai. Shi a Karai Kasang hpe lani mi hta masum lang, akyu hpyi nga ai.’ Dari gaw Daniela hpe ra sharawng nna, shi hpe n si shangun mayu ai. Daniela hpe gara hku hkye la lu na lam hpe sha, shani tup tam taw nga ai. Raitim, shi dazik jahkrat da ai matsun hpe, shi nan mung galai shai n mai ai. Dai majaw, Daniela hpe hkanghkyi nhkun de kabai bang kau na matu, matsun dat ra ai.

Dai shana hta, Dari gaw Daniela a matu grai myit tsang ya  ai majaw, yup pyi n lu yup ai. Hpang jahpawt hta, shi gaw hkanghkyi nhkun de alawan sa nna, Daniela hpe shaga let: ‘Na a Karai Kasang gaw nang hpe hkye la ya wa sai kun?’ ngu tsun ai.

Dari gaw nsen langai hpe na dat ai. Dai gaw Daniela a nsen re. Daniela gaw Dari hpe ndai hku bai tsun ai: ‘Yehowa a lamu kasa gaw hkanghkyi ni a n-gup hpe pat da ya ai majaw, shanhte ngai hpe shoihpa n lu jaw ai.’ Dari grai kabu mat nna, Daniela hpe nhkun kaw nna shaw la na matu matsun dat ai. Daniela hta mahkyit mahkret da hkrum ai lam mung hpa n nga ai. Dai hpang, hkawhkam wa ndai hku matsun ai: ‘Daniela hpe n re ai hku tsun ai masha ni hpe, hkanghkyi nhkun de kabai bang kau u.’ Dai masha ni hpe hkanghkyi nhkun kata de kabai bang kau ai hte kalang ta, hkanghkyi ni gaw shanhte hpe kawa sha kau ai.

Dari gaw shi a masha ni hpang, ndai hku matsun dat ai: ‘Masha yawng gaw Daniela a Karai Kasang hpe hkrit hkungga ra ai. Shi a Karai Kasang gaw shi hpe hkanghkyi ni a lata kaw nna, hkye la ya wa sai.’

Nang mung Daniela zawn Yehowa hpe shani shagu akyu hpyi ai kun?