Lana mi hta, Nebuhkadneza gaw grai hkrit kajawng hpa yup mang langai mu ai. Yup mang a lachyum hpe chye mayu ai majaw, hpaji rawng ai masha ni hpe shaga nna san tim, langai mi mung n lu htai ya ma ai. Hpang jahtum hta, hkawhkam wa gaw Daniela hpe shaga dat ai.

Nebuhkadneza gaw Daniela hpe ndai hku tsun ai: ‘Nye a yup mang hta, hpun langai hpe mu ai. Dai hpun gaw lamu du hkra kaba wa ai. Mungkan ga a gara shara kaw nna mi yu yu, dai hpun hpe mu lu ai. Dai hpun a alap ni hte asi ni gaw, grai law nna tsit tsawm taw ai. Hpun a shingnip kaw dusat ni sa hkring la nna, lakung lakying ni hkan gaw, u ni mung tsip tsip nga ma ai. Dai hpang, lamu kasa langai gaw lamu kaw nna yu hkrat wa ai. Shi ndai hku marawn tsun ai: “Hpun hpe kran kau u; lakung lakying ni hpe mung kran kau u. Ga kaw jung ngai ai aru hte hpun du hpe chyawm gaw, hpri hte magri sumri gyit hkang let, naw ngam da u: Shi gaw masha myit mat mat nna, dusat myit rawng wa u ga: dai hku nna, shi a ntsa aten 7 lai wa u ga. Karai Kasang gaw mungdan ni hpe uphkang ai madu rai nna, mungdan hpe jaw mayu ai wa hpe jaw lu ai lam, masha yawng chye wa na matu re.”’

Yehowa gaw Daniela hpe yup mang a lachyum tsun dan ai. Yup mang lachyum hpe Daniela chye na mat ai shaloi, kajawng mat ai. Hkawhkam wa hpe shi ndai hku lachyum htai dan ai: ‘Hkawhkam wa e, ndai yup mang a lachyum gaw na a hpyen ni a matu rai yang kaja na wa. Raitim, ya gaw na a matu rai taw nga ai. Kran kau hkrum ai hpun kaba gaw, nang rai taw nga ai. Nang gaw na a mungdan hpe sum mat nna, matse ai dusat zawn tsingdu ni sha wa na re. Raitim, lamu kasa gaw, ga kaw jung nga ai hpun du hpe naw ngam da shangun ai majaw, nang gaw hkawhkam bai byin wa na re.’

Laning mi na ai hpang, Nebuhkadneza gaw shi a hkawhkam htingnu magaw ntsa hta lam hkawm let, Babelon mare hpe yu nna ndai hku tsun ai: ‘Ndai mare gaw ngai gawde da ai grai hkik hkam ai mare kaba she rai nga ai. Nye a hpung atsam gaw grai tsaw htum nga ahka!’ Shi dai hku tsun nga ai laman hta sha, lamu kaw nna nsen pru wa ai: ‘Nebuhkadneza! Ya, na a mungdan hpe nang sum mat sai.’

Dai aten hta sha, Nebuhkadneza gaw masha myit mat mat nna, matse ai dusat myit shang wa ai. Dai majaw, shi gaw hkawhkam htingnu kaw nna, shapraw hkrum ai hte pa ga hta, matse ai dusat ni hte arau sa nga mat ai. Nebuhkadneza a kara ni gaw, galang mun zawn galu wa nna, shi a lamyin ni  mung u lamyin zawn galu wa ai.

Sanit ning na ai hpang, Nebuhkadneza gaw masha myit bai shang wa nna, Yehowa mung shi hpe Babelon hkawhkam bai galaw shangun ai. Nebuhkadneza ndai hku tsun ai: ‘Sumsing lamu a Hkawhkam Yehowa hpe ngai shakawn shagrau nngai. Yehowa gaw Uphkang Madu re ai hpe ya ngai chye sai. Shi gaw gumrawng ai masha hpe shagrit shanem dat nna mungdan hpe shi jaw mayu ai wa hpe lu jaw ai.’