Yesu hte kasa ni gaw, Kedron hkaraw hpe lai nna Tsanlun Bum de lung mat wa ma ai. Shagawng shana rai nna, shana yup tung lai sai aten hta re. Getsemane sun de du ai shaloi, Yesu shanhte hpe ndai hku tsun ai: ‘Ndai kaw nga nga nna, a maja nga mu.’ Yesu gaw loi mi tsan ai shara de sa nna, hput di di nga ai. Grai myit pu ba nna, Yehowa hpe ndai hku akyu hpyi ai: ‘Nang ra sharawng ai hku byin u ga.’ Shaloi, Yehowa gaw Yesu hpe n-gun jaw na matu, lamu kasa langai hpe shangun dat ai. Kasa ni hpang de Yesu du ai shaloi, shanhte yup pyaw nga ma ai hpe sa mu ai. Shaloi, shi gaw: ‘Rawt mu! Ya gaw yup taw na aten n re. Ngai hpe hpyen ni a lata de ap kau na aten du wa sai.’

Kade n na yang, Yuda gaw nhtu hte dawhkrawng lang ai shawa hpawng hpe woi awn nna, dai shara de du wa ai. Yesu hte arau dai sun de shanhte chyahkring hkring sa chye ai majaw, Yesu hpe gara kaw tam ra na hpe Yuda chye ai. Yesu kadai re ai hpe tsun dan na ngu nna hpyen la ni hpe Yuda tsun da ai. Yesu hpang de Yuda sa nna ‘Sara e’ ngu nna shakram dat ai. Dai hpang Yesu hpe apup dat ai. Yesu ndai hku tsun ai: ‘Yuda, nang gaw ngai hpe apup nna sadi run ai kun?’

Yesu gaw shawng de sit sa nna, masha hpawng hpe ndai hku san dat ai: ‘Nanhte kadai hpe tam nga ai kun?’ Shanhte gaw: ‘Nazaret masha Yesu’ ngu nna tsun ai. Yesu ndai hku mahtai jaw ai: ‘Ngai gaw shi re.’ Shaloi, masha ni gaw hpang de htingnut mat nna galau mat ma ai. Masha hpawng hpe Yesu ndai hku kalang bai san ai: ‘Nanhte kadai hpe tam nga ai kun?’ Shanhte gaw kalang bai ndai hku tsun ai: ‘Nazaret masha Yesu re.’ Yesu ndai hku mahtai jaw ai: ‘Ngai gaw shi re ai ngu tsun ngut sai le. Nye sape ni hpe gaw wa shangun dat u.’

Hpa byin nga ai hpe Petru chye mat ai shaloi, nhtu la nna hkinjawng agyi a mayam langai re ai Malhku a na hpe kahtam di kau ya ai. Raitim, Yesu gaw dai wa a na hpe ahtawk nna shamai ya dat ai. Dai hpang, Petru hpe ndai hku tsun ai: ‘Na a nhtu hpe zing dat u. Nang nhtu hte gasat yang, nhtu hte si ra na re.’ Hpyen la ni gaw Yesu hpe rim la nna shi a lata hpe sumri hte gyit dat ai.  Kasa ni chyawm gaw hprawng mat ma ai. Shawa hpawng gaw Yesu hpe hkinjawng agyi Anna hpang de woi sa mat ai. Anna gaw Yesu hpe san jep ngut ai hpang, dai shaning hta Hkinjawng Agyi galaw nga ai Kayapa a nta de sa dat ai. Kasa ni gara hku byin mat ai kun?