Yehowa gaw Israela ni hpe woi awn na matu tara agyi ni jaw da tim, shanhte gaw hkawhkam langai ra ma ai. Shanhte gaw Samuela hpe: ‘Anhte grup yin kaw nga ai amyu yawng hta hkawhkam ni nga ai. Anhte mung langai ra ai’ nga nna hpyi shawn ai. Dai hku tsun ai gaw shut ai ngu Samuela hkamsha ai majaw, Yehowa kaw akyu hpyi nna, dai lam ni hpe tsun dan ai. Yehowa gaw shi hpe ndai hku tsun ai: ‘Israela masha ni gaw nang hpe ningdang ai n re. Ngai hpe ningdang ai she re. Shanhte tsun ai hte maren hkawhkam lu wa na. Raitim, dai hkawhkam gaw shanhte kaw nna, grai law hkra hpyi shawn na hpe mung tsun dan dat u.’ Dai lam ni hpe tsun dan tim, shanhte gaw ndai hku tsun ai: ‘Hpa n ra ai. Anhte hkawhkam sha ra ai.’

Yehowa gaw Samuela hpe Shawlu ngu ai wa gaw shawng nnan na hkawhkam rai na ra ai nga nna tsun ai. Rama mare kaw nga ai Samuela hpang, Shawlu du wa ai shaloi, Samuela gaw Shawlu hpe baw ntsa sau jaw ya ai hku nna, hkawhkam aya tang dat ai.

Dai hpang, Samuela gaw Israela ni a hkawhkam nnan hpe madun na matu shanhte hpe shaga dat ai. Raitim, Shawlu hpe gara kaw tam tam n mu ma ai. Hpa majaw re ai hpe chye ai kun? Shi gaw arai ni a kata hta makoi nga ai majaw re. Hpang jahtum hta, shanhte gaw Shawlu hpe tam mu nna shaga sa wa ai. Masha hpawng lapran hta tsap shangun dat ai. Shawlu gaw masha yawng hta grau galu nna, hpraw tsawm ai wa re. Samuela ndai hku tsun ai: ‘Yehowa lata da ai wa hpe yu yu u.’ Israela ni gaw: ‘Hkawhkam asak galu kaba nga u ga law!’ nga nna jahtau ma ai.

Hkawhkam Shawlu gaw shawng nnan hta Samuela tsun ai hku hkan galaw nna, Yehowa a ga hpe madat ai. Raitim, hpang gaw shi galai shai mat ai. Ga shadawn, hkawhkam ni hta hkungga nat nawn na ahkang n nga ai. Kalang mi hta, Samuela gaw shi sa wa na aten du hkra la na matu Shawlu hpe tsun da ai. Raitim, Samuela gaw kalang ta n sa wa lu nna na taw ai majaw, Shawlu gaw shi nan hkungga nat nawng na matu dawdan wa ai. Samuela gara hku htang wa ai kun? Samuela gaw Shawlu hpe ndai hku tsun ai: ‘Yehowa hpe nang madat mara ai lam n nga ai.’ Shawlu gaw shi a mara ni kaw nna sharin la wa ai kun?

Dai hpang, Shawlu gaw Amalek masha ni hpe gasat sa wa ai shaloi, Samuela gaw shanhte kaw nna kadai hpe mung asak hkrung let hkum ngam da nga nna Shawlu hpe htet dat ai. Raitim, Shawlu gaw Hkawhkam Agag hpe n  sat na matu dawdan wa ai. Yehowa gaw Samuela hpe ndai hku tsun ai: ‘Shawlu gaw ngai hpe kau da sai. Nye a ga mung n madat sai.’ Samuela gaw grai myit n pyaw mat ai. Shi gaw Shawlu hpe ndai hku tsun ai: ‘Yehowa a ga hpe nang n madat ai majaw, kaga hkawhkam langai hpe shi lata sana.’ Samuela pru mat wa ai shaloi, Shawlu gaw Samuela a palawng matu hpe magra gang dat ai majaw, Samuela a palawng je mat ai. Dai shaloi, Samuela gaw Shawlu hpe ndai hku tsun ai: ‘Ndai palawng je mat ai zawn, Yehowa mung nang kaw nna ndai mungdan hpe dawm la kau sana re.’ Yehowa gaw shi hpe tsawra nna shi a ga madat ai marai langai ngai hpe ndai mungdan jaw sana re.