Yuda hkawhkam Yehosahpat gaw, mungdan hta nga ai Bala tawn hkungri ni hte gawng ngu sumla ni hpe jahten kau ai. Shi gaw mung masha ni Yehowa a tara ni hpe chye na matu ra sharawng ai. Dai majaw, Yehowa a tara ni hpe sharin ya na matu, Yuda masha ni yawng hpang de du agyi salang ni hte Lewi masha ni hpe shangun dat ai.

Yehowa gaw shi a amyu masha ni hte arau nga ai hpe makau grup yin na mungdan ni chye ai majaw, Yuda mung hpe n gasat gwi ma ai. Shanhte ni gaw Hkawhkam Yehosahpat hpe kumhpa pyi sa jaw ma ai. Raitim, Moba, Ammon hte Seira masha ni gaw, Yuda mung hpe gasat na matu sa wa ai. Yehowa a karum shingtau lam ra ai hpe Yehosahpat chye ai. Dai majaw, ma kaji ni hte hpawn masha yawng hpe, Yerusalem kaw zup hpawng shangun dat ai. Shanhte yawng a man hta shi ndai hku akyu hpyi ai: ‘Yehowa e, nang n lawm yang anhte awng dang lu na n re. Chyeju hte hpa galaw ra na lam tsun dan ya rit.’

Yehowa gaw akyu hpyi ga hpe ndai hku mahtai jaw ai: ‘Hkum hkrit. Ngai karum ya na. Asim sha tsap nga nna, ngai gara hku hkye hkrang Ia na lam mada yu nga mu.’ Yehowa shanhte hpe gara hku karum ya wa ai kun?

Hpang jahpawt hta, Yehosahpat gaw mahkawn mangoi chye ai ni hpe lata la nna, hpyen dap a shawng kaw nna rawt sa na matu tsun ai. Mahkawn hkawn ai ni gaw, Yerusalem mare kaw nna Teko majan pa de rawt sa mat wa ai.

Mahkawn hkawn ai ni gaw nsen ja ja hte Yehowa hpe shakawn kungdawn ai shaloi, Yehowa gaw shi a amyu masha ni a matu hpyen gasat ya ai. Yehowa gaw Ammon masha ni hte Moba masha ni hpe kashuk kashak byin hkra galaw dat ya ai majaw, shanhte shada da gasat hkat nna yawng si mat ma ai. Raitim, Yehowa gaw Yuda masha ni, hpyen la ni hte hkinjawng ni hpe gaw makawp maga ya ai. Makau grup yin mungdan na mung masha ni yawng gaw, Yehowa galaw ya ai lam hpe na yang, shi a amyu masha ni hpe matut nna makawp maga ya nga ai hpe chye mat ma ai. Yehowa gaw shi a amyu masha ni hpe gara hku makawp maga ya nga ai kun? Lam amyu myu hku nna re. Dai hku galaw ya na matu, shinggyim masha ni a karum shingtau lam n ra ai.