MASHA langai mi gaw nanhte hpang maga de lam hkawm sa wa yang, shi a hkum hkrang gaw nanhte a nta numgaw madin daram tsaw yang, dai wa hpe gara hku nna, myit nawn na kun? Dai wa gaw masha sha lawa she re law! Moi kalang mi e, Ginding aga ntsa hta, kaja wa masha sha lawa ni nga yu ai. Shan hte a kawa ni gaw sumsing lamu na lamu kasa ni rai ma ai, nga nna Chyum Laika hta tsun dan ai. Raitimung gara hku nna byin mai na i?

Nhkru ai lamu kasa Satan gaw, jam jau jaw na matu, bungli law nga ai, lam hpe matsing tawn mu. Karai Kasang a lamu kasa ni hpe pyi, nshawp ai amu galaw hkra, shakut nga ai. Hpang e lamu kasa ni kaw na nkau mi, Satan a ga hpe madat hpang wa ma ai. Sumsing lamu hta Karai Kasang galaw shangun ai amu hpe kau da ma ai. Ginding aga ntsa da yu sa wa nna, shinggyim hkum hkrang hpe tinang nan sa dagraw la ma ai. Hpa majaw re ai hpe chye ani?

Ga ningtsa kaw na tsawm htap ai num sha ni hpe Karai Kasang a kasha ni mu jang, shanhte hte rau nga mayu ma ai majaw, re nga nna, Chyum Laika kaw tsun dan ai. Dai rai nna shanhte gaw ga ntsa de yu sa wa nhtawm, dai numsha ni hte dinghku sa de sha ma ai. Chyum Laika hta e, ndai zawn galaw ai gaw shut ai nga nna, tsun ai. Hpa majaw nga yang lamu kasa ni hpe sumsing lamu e nga na matu, Karai Kasang hpan da ai majaw re.

Lamu kasa ni hte shanhte a madu jan ni kasha shangai wa ma ai. Dai ama ni gaw lak lai ma ai. Nnan e gaw nau lak lai na zawn n san ai. Raitimung hpang e gaw grau grau nna galu gaba wa ma ai hte, n-gun atsam kaba wa nna, grau grau n-gun ja wa ma ai. Masha sha lawa ni byin tai wa hkra re.

Ndai masha sha lawa ni gaw nhkru ma ai. Shanhte gaw hkum hkrang galu kaba ma ai, n-gun lapyin mu rawng ai majaw masha ni hpe aroi arip rai nna zing ri ma ai. Masha hkum shagu hpe shanhte zawn n kaja ai tai hkra, adip arip rai nna galaw shangun ma ai.

Enuk gaw si mat wa sai. Raitimung ga ntsa hta e, myit su ai masha langai mi bai nga wa ai. Shi a amying hpe Noa nga ma ai. Shi gaw Karai Kasang galaw shangun mayu ai amu hpe galoi mung galaw ai.

Lani mi hta e, Karai Kasang gaw, Noa hpe tsun ai, Nhkru n kaja ai masha yawng hpe, jahten kau na aten du sai. Raitimung Noa hte shi a kun dinghku masha ni, du sat amyu shagu hpe Karai Kasang gaw hkye la na re. Karai Kasang gaw gara hku nna hkye la na kun? Yu yu ga.